«Biełavija» ŭ abychod sankcyj nabyła ŭ Hambii try samaloty Airbus u drennym stanie
Biełaruskaja avijakampanija zaraz adnaŭlaje samaloty, jany mohuć źjavicca ŭ ekspłuatacyi ŭžo ŭ sakaviku. Heta buduć pieršyja «Aerobusy» ŭ parku «Biełavija», piša Reuters.
«Biełavija» rychtujecca ŭ abychod sankcyj papoŭnić park tryma samalotami Airbus, jakija raniej naležali hambijskaj avijakampanii Magic Air.
Try samaloty Airbus A330, kožny ź jakich zvyčajna źmiaščaje kala 250 pasažyraŭ, pryziamlilisia ŭ Minsku 17 žniŭnia 2024 hoda, zhodna z danymi Flightradar24 i dvuch inšych servisaŭ adsočvańnia palotaŭ. «Biełavija» znachodzicca ŭ pracesie padpisańnia kantrakta na kuplu hetych samalotaŭ, jakija prybyli ŭ nadzvyčaj niezdavalniajučym techničnym stanie, i płanuje pačać vykarystoŭvać ich užo ŭ viasnova-letni siezon.
Magic Air — małaviadomaja kampanija, jakaja zajmajecca lizinham samalotaŭ i pasłuhami ŭ śfiery avijacyi. U hetaj avijakampanii navat niama svajho sajta.
Choć sama Hambija nie padpadaje pad avijacyjnyja sankcyi, niekatoryja zarehistravanyja ŭ krainie pavietranyja sudny byli ŭklučanyja ŭ sankcyjnyja śpisy ZŠA, Vialikabrytanii i ES za dapamohu Rasii ŭ abychodzie naftavych abmiežavańniaŭ z dapamohaj tak zvanaha «cieniavoha fłotu» tankieraŭ. U žniŭni 2024 hoda halinovaje vydańnie Aviation Week paviedamlała, što Magic Air nakiravała try samaloty Airbus u Biełaruś z Kaira, Stambuła i Maskata.
«Biełavija», a taksama ŭrady Rasii i Biełarusi, nie adkazali na zapyty Reuters ab kamientary. Zvanki pa hambijskim numary Magic Air, uklučanym u rejestr, nie prajšli.
Hramadzianskaje avijacyjnaje kiravańnie Hambii (GCAA) paviedamiła, što samaloty byli pradadzieny pakupniku z Abjadnanych Arabskich Emirataŭ, pieramieščany ŭ Minsk i vyklučany z hambijskaha rejestra 19 žniŭnia 2024 hoda.
«GCAA atrymała paviedamleńnie ad Magic Air ab prodažy samalotaŭ kampanii z AAE, a taksama ab namiery pieravieźci ich u aeraport Minska i źniać z rehistracyi», — paviedamiŭ Reuters hienieralny dyrektar GCAA Fansu Bodžanh.
U žniŭni 2023 hoda ES zabaraniŭ zachodnim kampanijam pastaŭlać u Biełaruś tavary i technałohii dla avijacyjnaj haliny z-za praciahłaha ŭdziełu krainy ŭ rasijskaj vajennaj ahresii suprać Ukrainy.
Kampanija Airbus zajaviła, što stroha zachoŭvaje ŭsie dziejučyja zakony i sankcyi i što nie isnuje lehalnych sposabaŭ pastaŭki samalotaŭ, zapčastak, dakumientacyi abo pasłuh u krainy, jakija znachodziacca pad embarha. Pry hetym vytvorca padkreśliŭ, što ni adzin pastaŭščyk aryhinalnaha abstalavańnia nie moža spynić trecija baki, jakija majuć namier parušać sankcyi, a taksama niemahčyma kantralavać rynak patrymanych samalotaŭ ci niearyhinalnych kampanientaŭ, dakumientacyi i pasłuh.
Adnaŭleńnie samalotaŭ Magic Air u Biełarusi idzie marudna z-za ich drennaha stanu. Adzin z krynic vydańnia apisaŭ interjer jak «abłupleny». Da taho ž, pakolki «Biełavija» raniej vykarystoŭvała tolki samaloty Boeing, jaje piłotam daviałosia prachodzić pieranavučańnie na sistemy Airbus.
Adna z krynic paviedamiła, što samaloty buduć pierafarbavany ŭ liŭreju «Biełavija» i mohuć źjavicca ŭ ekspłuatacyi ŭžo ŭ sakaviku.
Dadatkovyja samaloty dapamohuć avijakampanii spravicca z rastučym popytam, paviedamiŭ krynica ŭ avijacyjnaj halinie Biełarusi. Pavodle dadzienych Mintransa, pasažyrapatok u 2024 hodzie vyras na 13,5% paraŭnalna z 2023-m.
Pavodle karparatyŭnych dadzienych Hambii, 99% akcyj Magic Air naležyć hramadzianinu Iardanii Tareku Zijadu Abdel Chamidu Al-Adžami. Pavodle ałbanskaha rejestra, jon taksama vałodaje chołdynhavaj kampanijaj u Ałbanii.
Magic Air taksama vałodała samalotam Airbus — A320, jaki pryziamliŭsia ŭ Minsku 17 žniŭnia 2024 hoda. Praź piać dzion jon byŭ pieradadzieny siryjskaj avijakampanii Cham Wings Airlines i ciapier lotaje pad rehistracyjaj YK-BAC, zhodna z dadzienymi Flightradar24. Cham Wings znachodzicca pad finansavymi sankcyjami ES za padtrymku režymu siryjskaha prezidenta Bašara Asada.
Ciapier čytajuć
Chłopca, jaki ŭ Lebiedzievaj chajaŭ Jeŭropu, asudzili za ŭdzieł u pratestach i ŭchileńnie ad vojska4
Kamientary