Kyrhyzstan uručyŭ notu pratestu rasijskamu pasłu paśla abłavy i žorstkaha źbićcia svaich hramadzian u maskoŭskaj łaźni
Abłava adbyłasia ŭ łaźnievym kompleksie «Badzioraść» 10 krasavika. Miarkujučy pa videa, niekalki dziasiatkaŭ napaŭhołych mužčyn hvałtam pakłali tvaram u padłohu. Nieviadomyja ŭ maskach i čyrvonych paviazkach z nadpisam «družyńnik» chadzili prosta pa ludziach.
Ministerstva zamiežnych spraŭ Kyrhyzstana vyklikała pasła Rasii ŭ Biškieku Siarhieja Vakunava z nahody źbićcia i masavaha zatrymańnia hramadzian Kyrhyzstana ŭ łaźnievym kompleksie ŭ Maskvie 11 krasavika.
Pavodle infarmacyi kyrhyzskaha boku, u łaźni na momant rejdu znachodzilisia kala 60 hramadzian Kyrhyzstana. Pavodle śviedčańniaŭ i kadraŭ ź miesca padziej, apublikavanych deputatam Žanaram Akajevym, rasijskija siłaviki ŭžyvali siłu — zatrymanych prymušali paŭźci pa padłozie, niekatorych źbivali.
Na aficyjnaj sustrečy z rasijskim pasłom Kyrhyzstan pieradaŭ notu z prośbaj rastłumačyć pravavyja padstavy dla praviadzieńnia apieracyi i vykarystańnia siłavych mietadaŭ. U vypadku nieabhruntavanaha hvałtu Biškiek patrabuje, kab u dačynieńni da vinavatych supracoŭnikaŭ maskoŭskich pravaachoŭnych orhanaŭ byli pryniaty miery.
«Prostyja ludzi — vadzicieli, kuchary — prosta pajšli ŭ łaźniu i byli zatrymanyja», — adznačyŭ deputat Akajeŭ na pasiadžeńni parłamienckaha kamiteta.
Kyrhyzstanski bok zaklikaŭ Maskvu da pavažlivaha staŭleńnia da mihrantaŭ i harantavańnia ich pravoŭ u adpaviednaści ź mižnarodnymi abaviazalnictvami.
Jak pišuć rasijskija kanały, nieviadomyja asoby z paviazkami «družyńnik» uvarvalisia va ŭstanovu, dzie znachodzilisia hramadzianie Kyrhyzstana, i, jak paviedamlajecca, źbivali i ździekavalisia ź ich dy prynižali. Heta było kala 5 hadzin da prybyćcia supracoŭnikaŭ palicyi, paśla čaho častka ź mihrantaŭ była adpuščanaja, a častka — dastaŭlena ŭ adździaleńnie palicyi i aštrafavanaja.
Kamientary
Pohromy - lubimaja zabava moskalej.