Naładčyka stankoŭ z «Pielenha» asudzili i abvieścili «terarystam». Letaś na pradpryjemstvie była abłava siłavikoŭ
Siarhieja Zielanoŭskaha sudzili za «zakliki da sankcyj».
Siarhieju Zielanoŭskamu 51 hod. Jon rodam ź Minska. Žanaty, maje niepaŭnaletniuju dačku. Pa źviestkach Digital Intelligence Team, paśla škoły jon advučyŭsia ŭ niedziaržaŭnaj Akademii parłamientaryzmu i pradprymalnictva (ciapier — Instytut parłamientaryzmu i pradprymalnictva), adnoj ź pieršych biełaruskich pryvatnych VNU.
Z 2003 pa 2015 hady mieŭ ułasnaje IP, jakoje zajmałasia roźničnym handlem na rynkach. Z 2018 pa 2020 pracavaŭ na MAZie i Minskim prajektna-kanstrukturskim technałahičnym instytucie.
Z 2020 hoda Zielanoŭski pryjšoŭ na pracu ŭ «Pielenh». Jon pracavaŭ na miechanaapracoŭčaj vytvorčaści na pasadzie naładčyka stankoŭ i manipulataraŭ z prahramnym kiravańniem, maje 4-y razrad.
Dakładnaja data jaho zatrymańnia nieviadomaja, ale heta adbyłosia paśla abłavy na «Pielenhu», jakaja niekalki miesiacaŭ praciahvałasia ź lipienia 2024 hoda. Ludziej praviarali na palihrafie, prahladali ich telefony, a taksama vyklikali na razmovy. Dahetul vychodziła rasśledavańnie «Biełpoła» pra toje, jak «Pielenh» abychodzić sankcyi.
Viadoma pra niekalki kryminalnych spraŭ suprać supracoŭnikaŭ pradpryjemstva pa artykułach pra «zakliki da sankcyj». Siarod ich i Zielanoŭski — pa č. 3 art. 361 KK jamu pahražała ad 4 da 12 hadoŭ kałonii sa štrafam. Prysud užo ŭstupiŭ u zakonnuju siłu. A 21 krasavika jaho proźvišča źjaviłasia ŭ śpisie «datyčnych da terarystyčnaj dziejnaści».
Sutnaść spravy, jak i prysud — nieviadomyja.
«Naša Niva» — bastyjon biełaruščyny
PADTRYMAĆ
Kamientary