Bitva za Kanstancinaŭku: čamu hetaje miesca moža stać hałoŭnaj metaj nastupu Rasii

Hety nasieleny punkt — častka vialikaj ahłamieracyi haradoŭ Słaviansk — Kramatorsk — Družkaŭka — Kanstancinaŭka. Pramysłovy i administracyjny centr padkantrolnaj Ukrainie častki Danbasa byŭ metaj rasijskaha nastupu jašče ŭ pieršyja miesiacy ŭvarvańnia.

Tady US RF sprabavali vyjści siudy z poŭnačy praź Liman i Izium, ale hetyja płany byli zrujnavanyja paśpiachovym ukrainskim kontrnastupam vosieńniu 2022 hoda.

Ciapier rasijanie pavolna, z bajami, prabivajucca da ahłamieracyi z poŭdnia, zachadu i ŭschodu. Štodzionnyja zvodki Hienštaba USU pakazvajuć, što mienavita tut — na miažy Pakroŭskaha, Tareckaha i Kramatorskaha napramkaŭ adbyvajecca najbolšaja kolkaść sutyknieńniaŭ u apošnija tydni.

Stanam na kaniec maja siły RF amal dasiahnuli apošniaj vialikaj pieraškody na svaim šlachu — vadaschovišča Kleban-Byk. Za niekalki kiłamietraŭ ad jaho pačynajucca ŭskrainy Kanstancinaŭki. Mienavita zachop hetaha horada moža stać hałoŭnaj metaj letniaj vajennaj kampanii Kramla. 

Z čaho pačaŭsia i jak raźvivajecca hety nastup? Prahalina ŭ abaronie i patrojny nastup

Kanstancinaŭka jak čyhunačny i aŭtamabilny vuzieł vykonvaje važnuju rolu łahistyčnaha chaba i ŭmacavanaha punkta dla USU.

Ź pieršych tydniaŭ poŭnamaštabnaj vajny jana nieadnarazova była pad udarami rasijskaj avijacyi i dalokabojnych rakiet. Z nabližeńniem frontu viasnoj uskrainy horada apynulisia ŭ zonie dasiažnaści FPV-dronaŭ i artyleryi rasijan.

Na pačatku maja pres-słužba 93-j asobnaj miechanizavanaj bryhady USU «Chałodny Jar» paviedamiła, što rasijskija aptovałakonnyja drony ŭžo atakujuć vajenny i cyvilny transpart niepasredna ŭ Kanstancinaŭcy.

«Varožyja apieratary ŭdajucca da padstupnaj taktyki: sadziać drony na darohi i čakajuć, kali pa ich budzie ruchacca technika ci aŭtamabili. A tady padnimajuć dron i padbivajuć ci źniščajuć transpart», — raspaviali padrabiaznaści ŭ bryhadzie. Ułada kaža, što 20-30% damoŭ u Kanstancinaŭcy ŭžo zrujnavanyja, ale ŭ horadzie ŭsio jašče zastajucca da 9 tysiač cyvilnych (da vajny tut žyło kala 70 tysiač). Dziaciej vyvieźli ŭsich, zapeŭnivaje kiraŭnik miascovaj vajennaj administracyi Siarhiej Harbunoŭ.

U 2023—2024 hadach Kanstancinaŭka ličyłasia adnosna tyłavym horadam, front byŭ za 30—40 km adsiul. Heta dazvalała vykarystoŭvać horad jak bazu dla raźmiaščeńnia ŭzbrajeńnia i łahistyki ŭkrainskich padraździaleńniaŭ, jakija viali bai na Bachmuckim i Tareckim napramkach.

Adnak viasnoj minułaha hoda rasijskija vojski pačali nastup z boku Bachmuta ŭ napramku Časavaha Jaru — heta hałoŭnaja vyšynia i apošni «bastyjon» abarony z uschodniaha fłanhu Kanstancinaŭki. Niahledziačy na toje, što rasijanie nie zdoleli chutka zachapić hetaje miesca, jany pastupova prahryzajuć ukrainskuju abaronu i ŭžo nablizilisia da zachodnich ŭskrain Časavaha Jaru. Adsiul da haradskoj zabudovy Kanstancinaŭki kala 10 km.

Pavialičyć

U červieni minułaha hoda armija RF pačała nastup na paŭdniovym fłanhu, atakujučy Tareck. Niahledziačy na zajavy ministerstva abarony Rasii ab poŭnym kantroli nad horadam, na ŭskrainach Tarecka jašče zachoŭvajucca asiarodki supracivu USU. Heta istotna zapavolvaje ruch rasijskich vojskaŭ, jakija ciapier sprabujuć znajści miesca na fłanhach horada, kala viosak Ščarbinaŭka i Dzilejeŭka.

Adsiul da Kanstancinaŭki prykładna 12—13 km. Viasnoj rasijanam udałosia ŭsio ž prabicca ŭ dzirku ŭ ukrainskaj abaronie. Heta adbyłosia na paŭdniovy zachad ad Kanstancinaŭki pobač z trasaj na Pakroŭsk. Tryvały čas rasijanie nie mahli začapicca za hetu darohu, ukraincy ŭdała kontratakoŭvali praciŭnika i vybivali z pazicyj.

Ale na pačatku maja armii RF udałosia pierarezać trasu, zachapić šerah viosak jak na poŭdzień ad jaje, tak i na poŭnač. Idzie havorka pra nasielenyja punkty Tarasaŭka, Malinaŭka, Novaja Paŭłaŭka, Alaksandrapal, Novaalenaŭka. Bolš za toje, ZS RF nastojliva sprabujuć prabicca paŭnočniej i całkam abrezać łahistyku Kanstancinaŭki z zachodniaha napramku.

Situacyja ŭskładniajecca tym, što adnačasova rasijskija vojski atakujuć u procilehły bok — u bok Mirnahradska-Pakroŭskaj ahłamieracyi. Heta nie daje Hienštabu USU zasiarodzić dadatkovyja siły na adnoj dzialancy, raśsiejvajučy ich na niekalki napramkaŭ.

Adnak va ŭkrainskim kamandavańni ličać, što ŭsio ž pieršasnaja zadača Kramla — zachop mienavita Kanstancinaŭki.

«U pieršuju čarhu vorah zacikaŭleny ŭ tym, kab stvaryć pahrozu dla horada Kanstancinaŭka. Mienavita z hetaj metaj jon sprabuje prarvacca na poŭnač ad trasy Pakroŭsk—Kanstancinaŭka i adnačasova abyści z boku Časavaha Jara. Asnoŭnyja našy namahańni skiravanyja na toje, kab nie dać jamu hetaha zrabić», — skazaŭ u efiry ŭkrainskaha telemarafonu pres-sakratar apieratyŭna-stratehičnaha hrupavańnia vojskaŭ «Chartyca» Viktar Trehubaŭ.

Što budzie z Kanstancinaŭkaj dalej

Rasijskija vajennyja błohiery ŭžo nazyvajuć situacyju kala Kanstancinaŭki amal što «stratehičnym praryvam rasijskaj armii». Prynamsi tak ličyć adzin z papularnych rasijskich vajennych ahladalnikaŭ Juryj Padalaka (3,1 młn padpisčykaŭ u Telegram).

«Užo niama nijakich sumnievaŭ u tym, što na hetaj dzialancy my ŭpieršyniu za ŭsiu vajnu atrymali kłasičny hłyboki praryŭ abarony praciŭnika stratehičnaha maštabu. Tak, chutkaść ruchu nie takaja, jak u Vialikaj Ajčynnaj, ale tady nie było dronaŭ, jakija skoŭvajuć luby ruch jak naš, tak i praciŭnika i nie dazvalajuć ruchacca nam chutčej», — napisaŭ jon 21 traŭnia.

Pavodle jaho słoŭ, rasijskaja armija ŭžo padyšła da rubiaža viosak Papoŭ Jar — Pałtaŭka — Rusin Jar — Ściapanaŭka. Prajści hetu liniju abarony dazvolić nablizicca da klučavoj darohi Dabrapolle — Kramatorsk i bolš aktyŭna bić pa joj, u pryvatnaści FPV-dronami.

Adpaviedna, heta moža paralizavać łahistyku USU na hetym napramku.

Ukrainski vajenny analityk hrupy «Infarmacyjny supraciŭ», pałkoŭnik zapasu ZSU Kanstancin Mašaviec nazyvaje pośpiech rasijskaj armii na hetaj dzialancy frontu «praryvam na taktyčnuju hłybiniu». Nastup na Kanstancinaŭku, pavodle jaho, viaduć adrazu dźvie ahulnavajskovyja armii RF: 8-ja i 51-ja.

Praryŭ na levym fłanhu zdoleli ažyćciavić padraździaleńni 8-j armii, jakija byli pierakinuty siudy viasnoj. Jany zdoleli ŭklinicca ŭ abaronnyja paradki USU amal na 9 km u hłybiniu i praciahvajuć pašyrać hety «klinyšak».

«Taktyčny pośpiech vidavočny. Dziakujučy značnaj kolkaści piachoty, a taksama mahčymaści, dziakujučy hetamu, pastajanna papaŭniać pieradavyja častki i padraździaleńni, što niasuć značnyja straty, asabovym składam, praciŭniku pakul što ŭdajecca padtrymlivać vielmi vysoki ŭzrovień intensiŭnaści svaich atakujučych/šturmavych dziejańniaŭ», — padkreślivaje Mašaviec.

Krynica BBC u kamandnym składzie USU pryznaje, što situacyja na hetym napramku vielmi abvastryłasia ŭ apošnija tydni.

Pavodle jaho mierkavańnia, zadačaj rasijskich vojskaŭ u bližejšaj pierśpiektyvie źjaŭlajecca sfarmiravać paŭakružeńnie Kanstancinaŭki i ŭziać pad ahniavy kantrol łahistyku Sił abarony.

Kali im heta ŭdasca, ukrainskim padraździaleńniam u bližejšy čas daviadziecca vychodzić z hłybokaj «kišeni» kala Tarecka na poŭnač — na liniju abarony pa rekach Byčok, Kazionny Tarec i Kleban-Bykskaha vadaschovišča. Kali ŭtrymać hety rubiež nie ŭdasca, to letam z vysokaj vierahodnaściu Rasija zmoža pačać šturm Kanstancinaŭska-Kramatorskaj ahłamieracyi.

Pytańnie, ci majuć baki dastatkova padrychtavanych reziervaŭ dla hetaj bitvy, zastajecca adkrytym.

• 0
• 0
• 0
• 1
• 0
• 0
• 2
• 0