U Połacku žančynu pakarali za videa ŭ tyktoku ź miljonnymi prahladami
U sudzie Połackaha rajona i horada Połacka razhledzieli spravu ab abaronie honaru, hodnaści i dziełavoj reputacyi dźviuch žančyn, jakija paciarpieli ad reputacyjnaj škody, naniesienaj im inšaj pałačankaj praz publikacyju ŭ tyktoku infarmacyi adnosna ich, jakaja była pryznanaja niepraŭdzivaj, piša miascovaje vydańnie Gorod214.by.
Abvinavačanaja žančyna ŭ kastryčniku 2024 hoda raźmiaściła ŭ tyktoku videa, na jakim dźvie rabotnicy charčovaha błoka adnoj ź miedycynskich ustanoŭ Połacka viartajucca z pracy z torbami. Videa supravadžałasia muzykaj ź filma «Džentlmieny ŭdačy» i podpisam, jaki namiakaŭ, što žančyny nibyta kraduć z pracy pradukty.
Videa chutka nabrała bolš za miljon prahladaŭ i vyklikała šmat niehatyŭnych kamientaroŭ. Paśla hetaha milicyja pravodziła na pradpryjemstvie pravierki, a pracadaŭca — pazapłanavyja revizii, ale fakt parušeńniaŭ nie byŭ paćvierdžany.
Paśla taho žančyny źviarnulisia ŭ sud z patrabavańniem pryznać apublikavanuju infarmacyju paklopnickaj, apraŭdać ich i vypłacić maralnuju kampiensacyju. Adkazčyca ŭ sudzie zajaviła, što ŭ videa nie abvinavačvała ich naŭprost i vykazvała tolki svaje zdahadki.
Sud, adnak, pryznaŭ, što raspaŭsiudžanyja źviestki nie adpaviadajuć praŭdzie i nanieśli maralnuju škodu. Adkazčyca ciapier abaviazanaja raźmiaścić u tyktoku rašeńnie suda, vypłacić žančynam pa 300 rubloŭ kampiensacyi i kampiensavać sudovyja vydatki.
Abskardžvać prysud tyktokierka nie stała.
Ciapier čytajuć
Maštabny zboj u troch biełaruskich bankach: z rachunkaŭ źnikajuć hrošy4
Kamientary