«Napišy «kalenduła» abo «bahun» — budzie toje ž samaje». Jaki smak u biełaruskaha vałoškavaha kvasu, u jakim zusim niama vałošak?
Vydańnie Blizko.by paspytała novy kvas z Babrujska — sa smakam i pacham vałošak. Takoha ŭ Biełarusi nibyta jašče nie było.
Pradukty z vałoškami — heta niešta novaje?
U mai 2019 hoda ŭ Homieli vypuścili maroziva «Bieły polus. Vałoška». Jano było błakitnaha koleru i ŭtrymlivała sapraŭdnyja pialostki vałošak. Vyrabili pieršuju partyju ŭ 8 ton i raźličvali, što jaje chopić da kanca miesiaca — ale biełarusy ŭsio raskupili za tydzień. Druhuju partyju zrabili bolšuju: 20 ton.
Cikava, što tady na ŭpakoŭcy raźmiaścili niekalki fraz na anhlijskaj i biełaruskaj movach — taki nievialiki razmoŭnik dla turystaŭ, jakija pryjazdžali da nas na Jeŭrapiejskija hulni.
Maroziva dahetul jość u katałohu vytvorcy. Ale kali toje, pieršaje, utrymlivała sapraŭdnyja pialostki vałošak i nasieńnie lonu, to zaraz u składzie tolki ekstrakt z kvietak vałošak.
Jak by tam ni było, a tady, 6 hadoŭ tamu, pieršy vałoškavy pradukt sapraŭdy staŭ chitom jak siarod samich biełarusaŭ, tak i siarod zamiežnikaŭ, jakija prylatali da nas na samalotach ź Jeŭropy. Tak-tak, marozivam častavali haściej u aeraporcie.
Taksama ŭ Biełarusi vypuskajuć harełku ź pialostkami vałošak, a niekalki hadoŭ tamu ŭ Hrodnie na 8-m adkrytym fiestyvali syru fabryka «Małočny śviet» ładziła dehustacyju syru z vałoškami.
A voś kvas z vałoškami — heta navinka. Choć sama pa sabie ideja zvaryć kvas ź jakimi-niebudź ziołkami — nie novaja.
Chto vypuskaje i dzie kupić?
Kvas «Chatni. Vałoški» vypuskaje zavod «Babrujski brovar». Na sajcie kampanii apisańnia hetaha kvasu jašče niama, choć jon pradajecca ŭžo tydni sa dva.
U instahram-akaŭncie kvasu skazana tak: «Kvas «Chatni «Vałoški» — pieršy kvas z vodaram vałošak, stvorany dla tych, chto šanuje śviežaść, naturalnaść i novyja ŭražańni. Kvitniejučyja pali, łaskavy viecier, ciopłyja ŭspaminy i tolki naturalnaje bradžeńnie, biez štučnych dabavak u kožnaj kropli! Adzin smak — biaskoncaść uspaminaŭ!»
Kvas užo možna kupić u kramach «Santa», «Jeŭraopt» i inšych. Butelka abjomam 1,4 litra kaštuje kala 3,55 rubla.
Što ŭ składzie?
Napoj aficyjna nazyvajecca «Napoj biezałkaholny sa smakam i vodaram vałošak «Kvas chatni. Vałoški» filtravany pasteryzavany hazavany kvas bradžeńnia».
Skład kvasu taki: vada artezijanskaja, cukar, kancentrat kvasnaha susła ŭ roznych spałučeńniach žytniaha i jačmiennaha soładu z trycikale, rehulatar kisłotnaści (małočnaja kisłata) i naturalny aramatyzatar.
Jak bačycie, ni vałošak, ni ich ekstraktu, ni esencyi, ni vyžymki — ničoha takoha ad vałošak niama i śledu. Jość tolki nienazvany aramatyzatar.
Koler kvasu całkam zvyčajny, «kvasavy». Ciomny, ale na praśviet prazrysty.
Jak jon na smak?
Voś što kažuć dehustatary z Blizko.by.
- «Pach kvasu jość, taksama jość ciažkaŭłoŭny kvietkavy vodar. Jak tanny saviecki parfium. Na smak — prachałodny, dobra aśviažajučyy, u jaho pryjemny smak kvasu. I paślasmak kvietkavaha vodaru abo farbavalnika, niešta jość takoje. Dobry kvas, ja b kuplaŭ. U śpiakotu, dumaju, vydatna tanizuje. Kali ŭ Minsku budzie +30 hradusaŭ — zojdzie na ŭra. Niešta novaje, niezvyčajnaje, vielmi dobraje».
- «Pa pachu adčuvajecca travianaja adduška. Smak kvasu jość, z dadatkam niejki. Dumaju, ź picaj by hety kvas dobra zajšoŭ. Voś hamburhiery zapivajuć kołaj, a treba jakraz takim kvasam».
- «Ja nie adčuvaju pach kvasu, navat nie skazała b, što heta kvas. Etykietka pa nastroi supadaje sa smakam: lohkaja, letniaja, chočacca na takoj pryrodzie siadzieć i pić kvas, tolki nie chapaje leta. Ja b jaho bieź ničoha piła, im nie treba ničoha zapivać. A voś, viedajecie, niešta jość ad smaku koły. U mianie dzicia pje koka-kołu, dakładna, tut smak koły. Ale tolki, u adroźnieńnie ad koły, hetym kvasam napivaješsia. Kołu pješ-pješ — i ŭsio adno pić chočaš, a hety kvas realna spatalaje smahu».
- «Heta smak śviežaści. Bradžeńniem pachnie, heta kvas. Zvyčajny kvas bolš daŭki, a hety — łajtovy. Vałošak nie adčuvaju, ja vałoški niuchała, tut nie pachnie zusim. Prysmak cukierki-šypučki z kołaj abo ledziaša-pieŭnika».
- «Na niešta padobna, ale nie mahu zrazumieć, na što. Niejkaja cukierka ci što, na cukierku padobna, na prysmak ledziaša. Ale varta zrabić paru hłytkoŭ — i bolš nie adčuvaješ, što smak niejki asablivy».
- «Saładžavy. Adčuvajecca sapraŭdny smak kvasu, ale ja lublu mienš sałodki. I naohuł jon padobny da bražki. Niezvyčajny prysmak jość, ale nie mahu skazać, što heta — vałoški ci nie. Smak travy niejki».
- «Nibyta narmalny, pachnie zvyčajnym kvasam. Ja nie viedaju, jak pavinny adčuvacca vałoški. Jon nie vielmi sałodki, ale chaładnik takim nie zapravić. Kali pić chałodnym, to možna zapivać šašłyčok».
- «Ja hety kvas užo paśpieŭ pasprabavać z tydzień tamu, i jon mnie adrazu spadabaŭsia. Viadoma, heta i blizka nie vałoški — vałoški ŭ čystym svaim palavym vyhladzie naohuł pachnuć nie vielmi. Tut ni pachu, ni smaku vałošak uvohule niama. Čysta markietynhavaja prynada. Napišy tut zamiest vałošak «kalenduła» abo «bahun» — budzie toje ž samaje, nichto nie zasumniajecca, što mienavita hetyja travy i pakłali ŭsiaredzinu. Jak i ŭ vypadku z kvasam z čaboram, ja zaŭvažyŭ, što smak vałoškavaha asabliva raskryvajecca, asabliva pryjemny, kali kvas vielmi chałodny, a voś pakajovaj tempieratury — atrymlivajecca łuchta niejkaja».
«Jak z płastylinu». Biełaruska paskardziłasia na śmiatanu ad «Savuškavaha»
«Fiermientavany napoj, skarbnica prabijotykaŭ». Zachad z zachapleńniem adkryŭ dla siabie kvas
Kolki kvašanaj kapusty treba źjadać za dzień dla zdaroŭja? Vy tolki nie dzivujciesia
U Biełarusi pačali vypuskać syr ź biełym trufielem
Ci možna pić biezałkaholnaje piva štodzień i kolki
Ciapier čytajuć
Anatol Kotaŭ užo vyjazdžaŭ u Turcyju i ličyŭ jaje biaśpiečnaj — krynicy2
Kamientary