Stała viadoma, kolki ludziej u Biełarusi pakarali za padziež žyvioły
Alaksandr Łukašenka 29 maja razam z kiraŭnictvam Saŭmina abmiarkoŭvaŭ «histaryčny maksimum» padziažu žyvioły. Jon zładziŭ raznos čynoŭnikam i zapatrabavaŭ ad staršyni Kamiteta dziaržkantrolu i hienprakurora dałažyć, kolki vinavatych «pasadzili za heta». Ale akazvajecca, na toj momant Łukašenka ŭžo viedaŭ ličby. Heta vynikaje ź lista, jaki KDK adpraviŭ jamu jašče 20 traŭnia. Dakumient akazaŭsia ŭ rasparadžeńni vydańnia «Lusterka» pry dapamozie Belpol.
List KDK za podpisam jaho kiraŭnika Vasila Hierasimava Alaksandru Łukašenku adpravili 25 traŭnia. Jon staŭ adkazam na daručeńnie razabracca ŭ situacyi z padziažoŭ bujnoj rahataj žyvioły. Łukašenka daŭ jaho jašče 15 traŭnia.
Atrymlivajecca, patrabujučy 29 traŭnia ad KDK i Hienprakuratury zavieści kryminalnyja spravy i pasadzić vinavatych, Łukašenka ŭžo viedaŭ kolkaść pryciahnutych da adkaznaści.
U dakumiencie, jaki apynuŭsia ŭ rasparadžeńni «Lusterka», kiraŭnik KDK śćviardžaje, što za ŭvieś 2024-y i pieršyja čatyry z pałovaj miesiacy 2025-ha viedamstva pryciahnuła da roznych vidaŭ adkaznaści bolš za 1400 čałaviek. U tym liku 30 staršyniaŭ rajvykankamaŭ i 55 ich namieśnikaŭ, jakija kuryrujuć pytańni sielskaj haspadarki.
«Pa faktach złačynstvaŭ, źviazanych z utojvańniem padziažu, ustanoŭlenych KDK i Hienieralnaj prakuraturaj, raspačata 378 kryminalnych spraŭ, u tym liku orhanami finansavych rasśledavańniaŭ — 48», — havorycca ŭ liście.
Hierasimaŭ taksama adznačyŭ, što vinavatym vystaŭlenaja suma naniesienaj škody «na sumu kala 702,5 tysiač rubloŭ».
Paśla narady ŭ Łukašenki 29 traŭnia ministr sielskaj haspadarki i charčavańnia Juryj Horłaŭ paviedamiŭ žurnalistam dziaržaŭnych ŚMI statystyku śmiarotnaści bujnoj rahataj žyvioły. Pa danych čynoŭnika, za 2024 hod padziož skłaŭ 147,9 tysiačy hałoŭ, a za čatyry miesiacy 2025-ha — 52 tysiač.
KDK pryvodzić takija ž ličby, ale bolš detalova. Praviarajučyja adznačyli, što ŭ 2024-m kolkaść zahinułych karoŭ, bykoŭ i cialat vyrasła na 19% u cełym pa krainie. Horš za ŭsio situacyja była ŭ Mahiloŭskaj (rost na 35%), Minskaj (23%) i Homielskaj (22%) abłaściach.
Za pieršyja čatyry miesiacy hetaha hoda mocna pahoršyłasia situacyja ŭ Viciebskaj vobłaści (plus 35% da anałahičnaha pieryjadu 2024-ha), taksama ŭ Hrodzienskaj i Homielskaj abłaściach (pa 10%).
Hierasimaŭ taksama paviedamiŭ Łukašenku, što ŭ struktury padziažu žyvioły karovy jak letaś, tak i ŭ pieršyja miesiacy 2025-ha zajmajuć amal tracinu, a cialaty da šaści miesiacaŭ — bolš za pałovu (53%).
Viedamstva taksama adznačaje, što «pryčyny padziažu žyvioły zastajucca niaźmiennymi z hodu ŭ hod».
«U asnoŭnym jany abumoŭlenyja parušeńniami technałohij karmleńnia (kala 53%), utrymańnia žyvioły (kala 45,3%), adsutnaściu naležnaj technałahičnaj dyscypliny», — piša Hierasimaŭ.
Taksama KDK dadaje, što ŭ kožnaj piataj sielskahaspadarčaj arhanizacyi bujnuju rahatuju žyviołu kormiać niajakasnymi karmami. A ŭ kožnaj druhoj arhanizacyi «vyjaŭlenyja niedachopy, jakija ŭ nastupnym mahli paŭpłyvać na zdaroŭje i zachavanaść žyvioły».
Pry hetym kiraŭnik KDK vinavacić u paharšeńni situacyi ŭrad, abłvykankamy i rajvykankamy, jakija nie pryniali «vyčarpalnych mier». Viedamstva taksama adznačaje niedastatkovuju pracu miascovych uładaŭ pa zakryćci vakansij vieterynaraŭ i zaatechnikaŭ.
Akramia taho, na dumku dziaržkantrolu, niama naležnaha kantrolu za pieršasnym ulikam pahałoŭja, z-za čaho «stvarajecca spryjalnaja situacyja dla ŭtojvańnia jaho padziažu».
Łukašenka zajaviŭ, što padziež žyvioły ŭ Biełarusi dasiahnuŭ «histaryčnaha maksimumu»
Jak ułady čarhovy raz pravalili płany ŭ sielskaj haspadarcy
Masavaja hibiel žyvioły ŭ Mahiloŭskaj vobłaści. Prakuratura zaviała dziasiatki kryminalnych spraŭ
Prakuratura pravieryła fiermy Homielščyny. Fakty žachlivyja
Ciapier čytajuć
«Piensijanieram dzieci pieraškadžajuć!» U Breście nie pieršy miesiac iduć sprečki nakont miesca dla budaŭnictva dziciačaha sada5
Kamientary