«Stanovišča adčajnaje». U «Hazpramie» nie viedajuć, kudy padzieć 60 miljardaŭ kubamietraŭ nieraspradadzienaha hazu
Paśla straty jeŭrapiejskaha rynku i pravału sprobaŭ zaklučyć novy kantrakt z Kitajem «Hazpram» nazapasiŭ liški hazu na dziasiatki miljardaŭ kubamietraŭ, i ŭłady sprabujuć zrazumieć, jak im možna znajści prymianieńnie.
U minułym hodzie zdabyča «Hazprama» skłała 416,19 młrd kubamietraŭ, ź jakich tolki 355,23 młrd udałosia pradać na źniešnim i ŭnutranym rynkach. U vyniku ŭ «Hazprama» zastałosia kala 60 młrd kubamietraŭ nieriealizavanaha hazu — abjom, supastaŭny z hadavoj zdabyčaj niekatorych hazazdabyvajučych krain (55 młrd kubamietraŭ u AAE) i ŭtraja pieravyšaje hadavoje spažyvańnie, naprykład, u Polščy (20 młrd kuboŭ), piša Reuters.
Situacyja ŭ paŭnočnych rehijonach, dzie znachodziacca radoviščy «Hazprama», blizkaja da krytyčnaj.
Raniej paŭmiljarda kubamietraŭ hazu štodzionna pampavałasia pa trubapravodach u Jeŭropu, a ciapier hetaha ekspartu niama, i «vielmi vostra staić pytańnie, što z hetym hazam rabić», zajaviŭ na PMEF-2025 kiraŭnik Minuschodraźvićcia Alaksiej Čekunoŭ.
Pavodle jaho słoŭ, adnym z varyjantaŭ moža być vykarystańnie hazu dla vytvorčaści elektraenierhii pad industryju štučnaha intelektu i błokčejna.
Ale ŭ Minenierha RF ličać taki prajekt nierentabielnym: dla data-centraŭ haz zanadta darahaja krynica enierhii, zajaviŭ na PMEF namieśnik kiraŭnika viedamstva Pavieł Sarokin. Pavodle jaho mierkavańnia, lišni haz «Hazprama» varta nakiravać na padtrymku vuhalnaj pramysłovaści. «My možam budavać (hazavyja) elektrastancyi kala (vuhalnych) šachtaŭ», — prapanavaŭ Sarokin.
Majučy najbujniejšyja ŭ śviecie zapasy hazu, «Hazpram» zastaŭsia biez mahčymaści jaho pradavać. I stanovišča kampanii «adčajnaje», ličyć ekśpiert pa naftahazavym rynku Michaił Krucichin, piša The Moscow Times.
Ekspart u Jeŭropu, jaki dasiahaŭ na piku 200 młrd kubamietraŭ u hod, ciapier ledź pieravyšaje 30 młrd kuboŭ i trymajecca na minimumach z druhoj pałovy 1970-ch.
Hazapravod «Siła Sibiry», navat paśla vychadu na prajektnuju mahutnaść (38 młrd kubamietraŭ), kampiensuje tolki piatuju častku stračanych abjomaŭ. Hady pieramoŭ z Kitajem ab novym hazavym kantrakcie tak i nie pryviali da vyniku, a śledam pravaliŭsia prajekt hazavaha chaba ŭ Turcyi.
«Ahulnaja karcina składajecca nie na karyść «Hazprama», — kanstatuje Krucichin. — Kałasalnyja zapasy hazu manietyzavać nie atrymlivajecca. Davieru da nadziejnaści hetaha pastaŭščyka ni ŭ kaho niama. A kali cudam niešta atrymajecca z kitajcami, to dachody ad pastavak nie akupiać ni budaŭnictva hazatranspartnaj infrastruktury, ni navat apieracyjnych vydatkaŭ na zdabyču i transparciroŭku hazu».
Kamientary
V krajniem słučaje sžieċ, viečnyj ohoń budiet silnym i vidien iz kosmosa.
Prapanuju rasijskija abrevijatury nie pierakładać na našu movu, a padavać ŭ aryhinalnym pieršapačatkovym napisańni.
Voś pasprabujcie zajści na sajt Minuschodraźvićcia, ci adšukać pa im źviestki na inšych krynicach.
Da taho ž i dystancyju varta trymać pamiž našaje-čužoje. Karysnym budzie pacichu stvarać adpaviednuju kanatacyju.