Amierykanski avijabłohier: Litaralna kožny biełarus, z kim ja razmaŭlaŭ pra palityku, kazaŭ, što Łukašenka — absalutny varjat
Błohier ź miljonami prahladaŭ Džoš Kejchił padzialiŭsia ŭražańniami ad palotu na samalocie Airbus A330-200, jaki ŭ abychod sankcyj nabyła «Biełavija», i ad sustreč ź ludźmi ŭ Minsku.
Aŭtar papularnaha jutub-kanała pra avijacyju (zvyš 800 tysiač padpisčykaŭ) Džoš Kejchił (Josh Cahill) za apošnija vosiem hadoŭ skarystaŭsia pasłuhami bolš jak 220 roznych avijakampanij i ździejśniŭ bolš za 800 palotaŭ. Niadaŭna jon vyrašyŭ asabista prateściravać samalot Airbus A330-200, jaki ŭ abychod sankcyj nabyła «Biełavija».
Jak adznačaje Kejchił u svaim videa, Biełaruś, pavodle mižnarodnych abmiežavańniaŭ, nie moža aficyjna nabyvać samaloty ci navat zapčastki i nie maje dostupu ŭ pavietranuju prastoru Jeŭropy. Tym nie mienš praz šeryja schiemy i pasiarednikaŭ avijakampanija atrymała hety łajnier.
Klučavym pasiarednikam byŭ iardanski biźniesoviec Tarek Abdel Chamid al-Ažami (Tarek Abdel Hamid Al Ajami), jaki kiruje fiktyŭnaj avijakampanijaj u Hambii — Magic Air, što nikoli nie vykonvała palotaŭ. Jon nabyŭ try A330 u tureckaj Onur Air i aformiŭ dakumienty tak, nibyta samaloty byli pradadzienyja ŭ Dubaj. U žniŭni 2024 hoda ŭsie try pavietranyja sudny zamiest pieralotu ŭ Afryku z vyklučanymi transpondarami pieralacieli praz Kaśpijskaje mora i pryziamlilisia ŭ Minsku. Na adnaŭleńnie techničnaha stanu pajšoŭ amal hod.
Siurpryz u sałonie
Na pieralot sa Stambuła ŭ Minsk Kejchił nabyŭ bilet u biznes-kłas i, jak sam pryznajecca, byŭ vielmi ździŭleny, kali patrapiŭ na bort kantrabandnaha Airbus A330-200 avijakampanii «Biełavija», jaki pieršapačatkova ŭ 2003 hodzie byŭ pastaŭleny avijakampanii Emirates, a paźniej niekalki hadoŭ absłuhoŭvaŭ pieraloty tureckaj Onur Air.
Zamiest čakanaha staroha sałona Emirates jon ubačyŭ elitny biznes-kłas ad Qatar Airways. Błohier demanstruje spražku ramiania biaśpieki ź simvolikaj katarskaj avijakampanii i źviartaje ŭvahu na firmovyja kolery hetaj avijakampanii ŭ azdableńni.
«Ja nie mahu ŭciamić, jak hety sałon biźnies-kłasa Qatar Airways apynuŭsia na padsankcyjnym byłym samalocie Emirates avijakampanii «Biełavija». (…) Ja nie dumaju, što vam kali-niebudź u žyćci daviadziecca palacieć na padsankcyjnym byłym samalocie Emirates z sałonam Qatar Airways i brendam «Biełavija», — zaŭvažaje Kejchił.
Pavodle słoŭ błohiera, ubudavanaja zabaŭlalnaja sistema na borcie nie pracuje. Adnak zamiest hetaha vydajuć płanšety na Android, na jakich «usiaho piać filmaŭ». Jon taksama demanstruje «miascovy prapahandyscki časopis» — «Sojuznoje hosudarstvo», darožny nabor avijakampanii i dzielicca svaimi ŭražańniami ad abiedu.
Kejchił demanstruje, jak jaho kresła ŭ biznes-kłasie raskładajecca ŭ poŭny «fłet-bed» — haryzantalnaje stanovišča.
«Nakolki heta kruta — lacieć «Biełavija» i mieć sapraŭdny haryzantalny łožak. (…) Ja viedaju niekalki avijakampanij, jakija nie pad sankcyjami, ale nie daciahvajuć da jakaści hetaha miesca».
Razmova z načalnikam
Prybyŭšy ŭ Minsk, błohier spadziavaŭsia, što pašpartny kantrol budzie farmalnaściu. Ale jaho, razam ź jašče 10-15 pasažyrami, adviali ŭ asobnuju zonu. Tam jamu daviałosia čakać svajoj čarhi. Zatym jaho zaprasili ŭ asobny pakoj, dzie byŭ niejki načalnik:
«Jak tolki ja zajšoŭ, jon byŭ vielmi viasioły: «O, Džoš, ja bačyŭ tvoj jutub-kanał». Potym spytaŭ: «Što ty tut robiš? Zdymaješ videa pra «Biełavija»?».
Błohier pryznajecca, što byŭ padrychtavany da takich pytańniaŭ:
«Ja adkazaŭ: «Nie, ja prosta turyst. Chaču pahladzieć muziej avijacyi». Jon zaŭvažyŭ: «Ty ž zdymaŭ videa?» — «Tak, zrabiŭ videa pra novy A330 «Biełavija».
Jon byŭ vielmi pryjazny, spytaŭ, kolki ŭ mianie najaŭnych, nie staŭ udavacca ŭ padrabiaznaści i skazaŭ: «Usio ŭ paradku. Pačakajcie 5-10 chvilin, i vy atrymajecie svoj pašpart i zmožacie iści»».
Pa słovach mužčyny, praz paŭhadziny jamu viarnuli pašpart, i jon biez prablem trapiŭ u horad. Kejchił adznačyŭ, što ŭsie pryjazna adnieślisia da jaho, u adroźnieńnie ad Maskvy, dzie jaho dapytvali try hadziny.
Niečakanaja adkrytaść ludziej
Raskazvajučy pra Minsk, Kejchił adznačaje najaŭnaść usich zachodnich brendaŭ i mahčymaść apłacić pakupki mižnarodnaj kartaj (u adroźnieńnie ad Rasii). Jon zhadvaje, što pieršy raz naviedaŭ Minsk u 2020-m hodzie, i zaŭvažaje:
«Majo ŭražańnie ad Biełarusi i ludziej tut: u ich sposab myśleńnia i śvietapohlad nasamreč vielmi zachodnija. Tut bolš adčuvajecca, što ty ŭ Budapiešcie ci Prazie, čym dzieści ŭ rasijskim horadzie, asabliva kali razmaŭlaješ z maładym pakaleńniem».
I jašče adna reč, jakuju adznačaje Kejchił, — heta staŭleńnie nasielnictva da Łukašenki:
«Kožny, litaralna kožny, z kim ja razmaŭlaŭ pra palityku, kazaŭ, što Łukašenka — absalutny varjat, što im soramna za jaho, što nichto za jaho nie hałasavaŭ i jon nie pavinien być pry ŭładzie».
Dla paraŭnańnia jon pryvioŭ svoj dośvied u Rasii:
«Kali ŭ Rasii ty razmaŭlaješ z moładździu, adukavanymi ludźmi ci prosta zvyčajnymi, zaŭsiody znojdziecca choć adzin prychilnik Pucina, jaki skaža: «Tak-tak, jon stavić Rasiju na pieršaje miesca, jon dziejničaje ŭ našych intaresach, my jaho padtrymlivajem».
A tut, u Biełarusi, kožny raz, kali zhadvaješ Łukašenku, usie kažuć: «Jon varjat». Nichto za jaho nie hałasuje. Nikomu jon nie patrebny. Jon prosta kłoŭn».
«Ja lublu hetuju krainu. Vydatnyja, pryhožyja ludzi», — zaŭvažaje Kejchił pierad adlotam.
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam39
Kamientary