Ranicaj 1 kastryčnika ŭ akvatoryi kala Ščecina adbyŭsia incydent z udziełam rasijskaha katara. Pavodle infarmacyi MUS Polščy, sudna kala 6:30 nabliziłasia da hazapravoda i na praciahu 20 chvilin znachodziłasia ŭ jaho niepasrednaj blizkaści — u radyusie pryblizna 300 mietraŭ, paviedamlaje RMF24.
Na situacyju źviarnuła ŭvahu pamiežnaja słužba z dapamohaj sistem nazirańnia. Pamiežniki vyjšli na radyjosuviaź z ekipažam katara i zahadali nieadkładna pakinuć zonu. Zahady byli vykananyja, i incydent zaviaršyŭsia biaśpiečna. Jak padkreśliła pradstaŭnica MUS Karyna Haŭlecka, terytoryja vakoł stratehičnaha abjekta zastajecca pad pastajannym kantrolem słužbaŭ.
Ministr nacyjanalnaj abarony Polščy Uładzisłaŭ Kasiniak-Kamyš adznačyŭ, što ŭ padobnych vypadkach nieabchodna dziejničać rašuča, ale ŭzvažana. Jon taksama nahadaŭ pra nieabchodnaść manitorynhu tak zvanaha «cieniavoha fłotu» — sudnaŭ, jakija afarmlajucca na sumnieŭnyja kampanii, nie majuć strachoŭki i vykarystoŭvajucca, u tym liku Rasijaj, dla abychodu sankcyj.
Premjer-ministr Polščy Donald Tusk, vystupajučy ŭ Kapienhahienie na samicie Jeŭrapiejskaj palityčnaj supolnaści, zajaviŭ, što incydenty na Bałtyjskim mory i ŭ rehijonie adbyvajucca amal štodnia. Jon padkreśliŭ, što «heta nie prosta pravakacyi, a novaja forma vajny», jakaja patrabuje ad Jeŭropy jasnaha razumieńnia i adpaviednych dziejańniaŭ.
Kamientary