Biełarus tydzień kuplaŭ łatarejnyja bilety zamiest abiedaŭ. Kolki vyjhraŭ?
Andrej ź Minska zładziŭ čelendž: nie chadziŭ u stałovuju tydzień, kab na zekanomlenyja hrošy kuplać łatarejnyja bilety. Kolki hrošaj patraciŭ i kolki vyjhraŭ, chłopiec raskazaŭ žurnalistu Myfin.
«Žonka skazała, što ja durnieńki. Adkazaŭ joj: «Vyjhraju kvateru — ty ničoha nie atrymaješ»
Pieršaje pytańnie Andreju — z čaho raptam pryjšła ideja kuplać bilety zamiest ježy. Chłopiec tłumačyć, što lubić drobnyja finansavyja ekśpierymienty. Paru hadoŭ tamu na praciahu hoda adkładaŭ usie manietki z rešty. Testavaŭ strachavoje nakapleńnie. Adkryvaŭ nievialikija depazity ŭ bankach.
— U mianie zvyčajnaja siaredniaja zarpłata, kupić umoŭny bitkojn ja nie mahu, tamu «zabaŭlajusia» na drobnyja sumy. Kali vyrašyŭ kuplać łatarejki, žonka paśmiajałasia i skazała, što ja durnieńki. Ja dakładna tak ža paśmiajaŭsia i adkazaŭ, što kali vyjhraju kvateru, taja budzie tolki majoj.
— U mianie dakładna nie było mety ŭzbahacicca. Heta ŭsiaho tolki zabava.
Kab heta nijak nie adbivałasia na finansach, jakraz i vyrašyŭ, što zekanomlu na abiedach. Tydzień braŭ u ofis ssabojki (ježu z domu), choć nie lublu ciahać z saboj kantejniery. Atrymałasia, što tydzień nie chadziŭ u stałovuju z kalehami i krychu sumavaŭ bieź ich u abied.
Pieršapačatkova płanavaŭ kuplać łatarejnyja bilety kožny dzień na praciahu miesiaca, ale zrazumieŭ: raznastajnaści nie tak šmat. Kali b pravodziŭ ekśpierymient miesiac — daviałosia b kupić kuču adnolkavych biletaŭ. Dy i nie padabałasia pierśpiektyva kožny dzień stajać u čerhach.
— Mianie nikoli nie pryvablivaŭ udzieł u padobnych rozyhryšach, tamu dośviedu ŭ mianie nie było.
Tolki pamiataju, jak mama na pačatku 2000‑ch skuplała ŭ Minsku łatarejki «Balet», u ich treba było sabrać słova BALET. Kuplaješ bilecik, ściraješ srebnuju plonku — i tabie dastajecca litara. Źbiraješ poŭnaje słova — atrymlivaješ hrošy. Da hetaha času pamiataju, što mama sabrała niekalki kamplektaŭ słova «BLET», litara «A» joj nijak nie traplałasia.
Što ździviła chłopca ciapier — pa-pieršaje, toje, što ŭ nas pradajucca imhniennyja łatarei (jon dumaŭ, što ich daŭno niama). Pa-druhoje, kali chacieŭ kupić na pošcie «Supierłato» z rozyhryšam u najbližejšyja vychadnyja, takich nie akazałasia: usio razabrali. Pryjšłosia kuplać bileciki na hulniu, jakaja pavinna była prajści tolki praz dva tydni.
Na što taksama źviarnuŭ uvahu Andrej — dzie b jon ni ździajśniaŭ kuplu, usiudy jamu prapanoŭvali samomu vybrać, jaki mienavita z adnolkavych biletaŭ jon kupić. Časam pierad im stavili cełuju skrynku adnolkavych «kardonak» i prapanoŭvali nyrnuć rukoj.
— Heta značyć, pradaŭcy nie vybirali za mianie.
Jašče adzin siurpryz staŭ nie nadta pryjemnym.
— Ja ŭbačyŭ na vitrynie łatarejku, na jakoj namalavana navahodniaja jełka. Jašče ździviŭsia: ciapier vierasień, pryčym tut jełka? Akazałasia, što rozyhryš — u śniežni, to-bok vyniki ja daviedajusia tolki bližej da 2026 hoda.
Nakupiŭšy łatarejek, Andrej skłaŭ ich u papku i na čas zabyŭsia pra ich. Nie ścior achoŭny słoj tam, dzie možna było mamientalna daviedacca vynik. Nie praviaraŭ «Supierłato», choć z momantu praviadzieńnia tyražu prajšli tydni. Kaža, nie dachodzili ruki:
— Hledziačy praŭdzie ŭ vočy, ja razumieŭ, što na hetym nie zarabić. Heta ŭsiaho tolki zabava. Jak kažuć — just for fun (tolki dziela zabavy). Ni na jakija istotnyja pryzy nie raźličvaŭ.
Kolki patraciŭ i kolki vyjhraŭ
Za piać pracoŭnych dzion Andrej kupiŭ 17 łatarejek:
«Supierłato» — 3 št., pa 5 rubloŭ (usiaho 15 rubloŭ);
«Miniłato» — 2 št., pa 3,5 rubla (7 rubloŭ);
«Mih udačy» — 2 št., pa 4,5 rubla (9 rubloŭ);
«Bonus plus» — 2 št., pa 2,5 rubla (5 rubloŭ);
«Strajk» — 2 št., pa 3 rubli (6 rubloŭ);
«Biełaviežskaja pušča» — 2 št., pa 4 rubli (8 rubloŭ);
«Śviatočnaja» — 2 št., pa 3 rubli (6 rubloŭ);
«Sportłato» — 2 št., 10 rubloŭ za ŭsie staŭki.
Usiaho patračana: 66 rubloŭ.
«Miniłato» akazałasia «pustym», zatoje ŭ «Biełaviežskaj puščy» ŭdałymi dla Andreja stali abodva bilety, kožny prynios jamu pa 4 rubli.
Jašče adna pieramoha — u «Supierłato», 5 rubloŭ 90 kapiejek. Vyniki Andrej praviaraŭ u internecie, kab nie tracić čas na prahlad pieradačy pa TB.
Što z astatnimi vyihryšami? Ułasna, ničoha.
Usie astatnija imhniennyja łatarejki akazalisia biez pryza.
U «Sportłato 6/49» Andrej adhadaŭ 1 ličbu z 6 u pieršym raŭndzie, a taksama 2 ličby z 6 u druhim raŭndzie. Heta dobra, ale niedastatkova dla pieramohi. U «Sportłato 5/36» nie adhadaŭ uvohule ničoha.
— Navat niejak zasmuciŭsia, kali ściraŭ achoŭny słoj i čarhovy raz razumieŭ: pryza niama. Da hetaha dumaŭ, što ŭdałymi dla mianie budzie chacia b pałova biletaŭ. Nijakaha asablivaha zadavalnieńnia atrymać nie ŭdałosia, bo projhryšaŭ akazałasia zašmat dla mianie. Chtości skaža, što treba hulać šmat, kab pieramahać. Adnak ja kupiŭ nie paru łatarejek, a siamnaccać. Ź ich čatyrnaccać «pustyja».
Choć ja jašče nie pravieryŭ «Śviatočnuju» łatareju, bo rozyhryš budzie tolki ŭ śniežni. U «Śviatočnaj» jość šaniec atrymać imhnienny pryz, ale i tut u maim vypadku promach.
Padviadziom vynik
Kolki łatarejek kupiŭ Andrej: 17 štuk.
Suma pakupki: 66 rubloŭ.
Kolki biletaŭ akazalisia vyjhryšnymi: 3 štuki.
Ahulnaja suma vyjhryšu: 13,9 rubla (4 + 4 + 5,90).
— Kali ja kazaŭ žoncy, što, mahčyma, vyjhraju kvateru — viadoma ž, ja žartavaŭ. I ŭsio ž ja dumaŭ, što vyjhryš składzie chacia b 40% ad układzienych hrošaj. Pa sutnaści, udałosia adbić krychu bolš, čym 20%.
Na hetym ekśpierymient ja skonču i praciahvać nie budu. Moj dośvied kaža, što lepš tracić hrošy na abiedy, čym na łatarei.
Ciapier čytajuć
«Biełarusy nahadvajuć čałavieka z tryvožnym razładam». Paet Vital Ryžkoŭ pra zvańnie seks-simvała paezii, batł z Najdzionavym, Karža i Cichanoŭskuju2020
Kamientary