Zanadta paśpiachovaja dla pravału. Jak impieryja Tejłar Śvift zrabiła jaje nastolki maštabnaj fihuraj, kab jana zmahła paciarpieć parazu
Siońnia, 3 kastryčnika, vychodzić jaje novy albom The Life of a Showgirl, i składana nazvać pryčyny, pa jakich jon by nie zmoh stać fienamienalna paśpiachovym.
Apoŭnačy 19 krasavika minułaha hoda vyjšaŭ adzinaccaty studyjny albom Tejłar Śvift The Tortured Poets Department. Na praciahu 31 treka pra raźbitaje serca i tuhu Tejłar Śvift ździrała skuru sa starych ran svaich ramanaŭ z rok-muzykantam Mećju Chili i akcioram Džo Ełvinam, adkazvała na krytyku ŭ sacsietkach i raskazvała pra ciažki ciažar słavy, piša Bi-bi-si.
Acenka krytykaŭ była ŭ lepšym vypadku strymanaj.
Muzyčny časopis NME nazvaŭ albom «redkaj niaŭdačaj» dla Śvift i adznačyŭ «teksty, jakija vyklikajuć krynž». New York Times apisaŭ hetuju pracu jak «abmiežavanuju» i «poŭnuju samalubstva».
U piatnicu 3 kastryčnika vychodzić jaje novy albom The Life of a Showgirl, i składana nazvać pryčyny, pa jakich jon by nie zmoh stać fienamienalna paśpiachovym.
Bolš za piać miljonaŭ fanataŭ dadali jaho ŭ papiaredniaje zachavańnie ŭ dadatku Spotify (i heta čarhovy rekord u historyi hetaj kampanii), a papiarednija zakazy na śpiecyjalnaje viniłavaje vydańnie raskupili ŭ anłajn-kramie Śvift mienš čym za hadzinu. I ŭsio heta — jašče da taho, jak publika pačuła sam albom.
U svaje 35 hadoŭ Śvift, padajecca, stała zanadta maštabnaj fihuraj, kab paciarpieć parazu. Jaje miesca siarod najlepšych vykanaŭcaŭ usich časoŭ užo zabiaśpiečana.
Ale ci zmoža jana praciahvać zastavacca ŭ topie, kali hust publiki ŭsio bolš źmiaščajecca ŭ bok śpievakoŭ, u jakich u žyćci ŭsio składana i jakija nie bajacca adkryta havaryć pra svaju ŭraźlivaść?
Žalezny kantrol nad vobrazam
Bolš, čym, mabyć, luby inšy sučasny muzykant, Śvift vyjšła za miežy pop-muzyki.
Sprava nie tolki ŭ maštabach prodažaŭ — inšyja zorki, nakštałt Majkła Džeksana i Madonny, pradavali bolš kružełak (choć heta było da taho, jak epocha stryminhu źniziła hetyja pakazčyki).
Toje, što adroźnivaje Śvift, — heta jaje ŭmieńnie vyjści za ramki samoj muzyčnaj industryi, pabudavaŭšy vakoł siabie ŭłasny suśviet.
Joj udałosia stać pravaŭładalnicaj svajoj muzyki, i ciapier jana, u adroźnieńnie ad mnohich inšych artystaŭ, nie zaležyć ad hukazapisvalnych kampanij.
Jana vyraściła armiju maksimalna addanych «śvifci». Dziasiatki miljonaŭ prychilnikaŭ amal napeŭna zahruziać jaje novy reliz niezaležna ad taho, što skažuć krytyki.
«Jana pabudavała vakoł siabie impieryju, dzie nichto nie moža ŭkazvać joj, akramia jaje samoj», — kaža Taćciana Sirysana, muzyčny analityk kansałtynhavaj kampanii MIDiA.
Ale ŭ asnovie pośpiechu Śvift lažyć žalezny kantrol nad jaje publičnym vobrazam.
Z 2023 hoda jana nie davała nivodnaha vialikaha intervju mejnstrymavym časopisam — tady jana pahavaryła z Time paśla taho, jak vydańnie nazvała jaje «Čałaviekam hoda». Heta aznačaje, što ŭsio, što fanaty daviedajucca pra jaje, zychodzić naŭprost ad jaje samoj — niachaj heta buduć pasty ŭ sacsietkach abo detali, jakija jany vyčlaniajuć ź jaje piesień.
Pra svaje niadaŭnija zaručyny z hulcom u amierykanski futboł Trevisam Kiełsi jana abjaviła praź instahram, a novy albom prasoŭvała praz padkast svajho žanicha New Heights, dzie jana, pa ŭsioj bačnaści, maje peŭny redaktarski kantrol.
«Dla jaje vielmi charakterna rabić takija abjavy naŭprost — biez čyjho-niebudź pasiarednictva», — kaža Eni Zaleski, muzyčny historyk i aŭtar knihi Taylor Swift: The Stories Behind the Songs («Tejłar Śvift: Historyi za jaje pieśniami»).
Śvift zaŭsiody šanavała mahčymaść mieć pramuju suviaź sa svaimi prychilnikami. Pa słovach Zaleski, taki styl kamunikacyi jana vybrała jašče tady, kali była padletkam i śpiavała kantry ŭ Nešvile, zavajoŭvajučy aŭdytoryju spačatku na płatformie MySpace, a paźniej — na Tumblr.
Heta stała mahčymym dziakujučy asablivaściam muzyčnaha prava: jaje staraja hukazapisvalnaja kampanija vałodała pravami na albomy (i na majstar-zapisy kožnaj pieśni), ale Śvift zachavała za saboj vydavieckija pravy na miełodyi i teksty.
Heta aznačała, što jana mahła zabaraniać radyjostancyjam i telešou vykarystoŭvać uryŭki Shake It Off abo Love Story — kali tolki jany nie stavili novuju viersiju, vykarystańnie jakoj jana kantralavała.
A pry padpisańni novaha kantrakta z łejbłam u 2019 hodzie Śvift nastajała na tym, kab joj naležali i pravy na majstar-zapisy, i vydavieckija pravy — heta značyć, pa sutnaści, jana ciapier całkam kantraluje toje, kali i jak hučyć jaje muzyka.
Pa słovach Eni Zaleski, mienavita hetaja hatoŭnaść kinuć vyklik muzyčnaj industryi vyłučaje Śvift: «Vielmi redka byvaje, kab usie hetyja pravy znachodzilisia ŭ adnych rukach».
U mai hetaha hoda Śvift zaviaršyła epapieju, vykupiŭšy svaje pravy na majstar-zapisy ŭ staroj hukazapisvalnaj kampanii. «Usia muzyka, jakuju ja kali-niebudź stvarała, ciapier naležyć mnie, — napisała Śvift na svaim sajcie. — Ja raspłakałasia ad ščaścia».
Heta byŭ pakutliva publičny praces — i mienavita tamu jon byŭ važny, ličyć Zaleski: «Mnie žudasna padabajecca, što jana zdymaje zasłonu tajamnicy z takich składanych biznes-spraŭ».
Jana źmianiła praviły hulni i dla inšych artystaŭ. Šviedskaja pop-zorka Zara Łarsan raskazała mnie, što kali jaje łejbł vystavili na prodaž, jaho hienieralny dyrektar prapanavaŭ joj mahčymaść vykupić svaje majstar-zapisy.
«[Jon] bačyŭ, što adbyłosia z Tejłar [Śvift], i zrazumieŭ, što dla jaho heta byŭ by horšy kašmar».
Adnak nie ŭsie tak uražanyja tym, jak Śvift viadzie spravy.
Ejman Ford, aŭtar i ahladalnik muzyčnaj industryi, kaža, što lohka namalavać sproščany siužet u duchu «David suprać Halijafa» pra baraćbu zorki sa svajoj hukazapisvalnaj kampanijaj. Jon ličyć, što ŭ jaje rašeńni pierazapisać staryja albomy mahła prysutničać i dola «drobiaznaści».
Pieramovy ŭ muzyčnaj industryi, pa jaho słovach, «ruchajucca nie tolki hrašyma, što vidavočna, ale jašče i eha… dumaju, heta była dzivosnaja sumieś usiaho hetaha».
I jon adznačaje, što Śvift — nie pieršy muzykant, jaki dabivaŭsia kantrolu nad svajoj tvorčaściu: siarod tych, chto sudziŭsia za svaje aŭtarskija pravy, byŭ, naprykład, Poł Makartni.
Luboŭ niekalkich pakaleńniaŭ robić Śvift niaŭraźlivaj
Śvift jak karaleva pop-muzyki nastolki tryvała zaniała daminujučaje stanovišča, što mała chto zadavaŭsia pytańniem, jak i kali jaje «skinuć». Ale zaraz hetyja pytańni — pakul što cicha — pačynajuć hučać.
Pa-pieršaje, budučaje viasielle. Śvift pabudavała bahaćcie na pieśniach pra raźbitaje serca i niaščasnaje kachańnie. I ciapier, kali 14‑razovaja ŭładalnica «Hremi» abjaviła pra svaje zaručyny, niekatoryja zadumalisia: što ž ciapier budzie z fanatami, jakija znachodzili siabie ŭ hetych pieśniach?
Ci nie aznačaje «šlubnaja era» ŭ žyćci Śvift kaniec pieśniam pra raźbitaje serca, jakija zrabili jaje paznavalnaj, zadalisia pytańniem u ABC News. Ale analityki adznačajuć, što «śvifci» — heta ŭžo nie adno pakaleńnie. Heta i daŭnija prychilniki, jakija zaŭvažyli junuju kantry-śpiavačku ŭ 2006 hodzie, i siońniašnija padletki, jakija papoŭnili armiju fanataŭ padčas kancertnaha tura Eras Tour u 2023‑2024 hodzie.
«I heta sapraŭdy robić jaje niaŭraźlivaj», — kaža Zaleski.
Jaje teksty taksama evalucyjanavali z časoŭ rańnich albomaŭ.
«Jana značna hłybiej jak aŭtar piesień, čym mnohija dumajuć, — i heta dapamahaje joj zastavacca aktualnaj», — śćviardžaje Zaleski.
Dapamahaje joj i ŭmieńnie pieratvaracca — ad kantry-ery 2000‑ch da pierachodu ŭ pop i siabroŭstva ź viadomymi śpiavačkami i supiermadelami, uklučajučy Karli Kłos, Sielenu Homies, Karu Deleviń i Džydžy Chadzid.
Jaje karjera nahadvaje karjeru Madonny, jakaja taksama nie raz «pieravynachodziła» siabie. Ale Śvift razumieje, što nichto — navat Madonna — nie moža viečna dyktavać husty ŭ pop-kultury.
«Ludzi znoŭ chočuć brudu»
Dla luboj pop-zorki, nie tolki dla Śvift, prablemy pačynajucca tady, kali hłabalna źmianiajucca muzyčnyja husty publiki, a śpiavak nie paśpiavaje padładzicca.
Muzyka Śvift — zanadta adpaliravanaja, a zaraz novyja pakaleńni muzykaŭ adychodziać ad hetaha, znachodziačy pryhažość u niedaskanałaści.
Jak adznačaje Sirysana, u trendzie apatyja i nihilizm. Mienavita da hetych nastrojaŭ paśpiachova źviarnułasia brytanskaja śpiavačka Charli XCX u letašnim albomie Brat, jaki jana apisała jak «chaos i emacyjnuju sumiatniu pad kłubny saŭndtrek».
«Heta idealna supała z postpandemičnym nastrojem: ludzi znoŭ chočuć brudu, jany chočuć kuryć, tusavacca, chočuć, kab na ich kapaŭ čužy pot, — kaža Sirysana. — Voś heta samaje pačućcio, što ništo nie važna».
Alivija Radryha, jakoj 22 hady, piša pra sustrečy z byłymi, jakija sama ž ličyć drennaj idejaj. Łoła Janh, jakoj 24, śpiavaje ŭ pieśni Messy: «Ja kuru, jak dymachod, ja nie chudyška i kožny druhi tydzień zryvajusia, jak Brytni Śpirs».
U Śvift, jakoj u śniežni spoŭnicca 36 hadoŭ, zusim inšy vobraz. Jana chutčej typovaja karaleva vypusknoha ŭ amierykanskaj škole. Tak, u niekatorych albomach jana pryznajecca ŭ niedaskanałaści — ale niachaj heta buduć pieśni pra ramantyčnyja pierypietyi ci sprečki sa znakamitaściami, mienavita jana kantraluje situacyju.
«Ci adpaviadaje estetyka i vajb Tejłar tamu, što zaraz adbyvajecca ŭ kultury? Ubačym», — kaža Sirysana.
Čym vyšej uźlot, tym bolš baluča padać
Mienavita maštaby pośpiechu Śvift u kančatkovym vyniku mohuć syhrać suprać jaje, ličyć Sirysana.
«Čym bolš ty raścieš, tym bolš ludzi zadajucca pytańniem, jak ty trapiła na hetyja viaršyni i ci zasłuhoŭvaješ ty hetaha», — kaža muzyčny ekśpiert.
Śvift krytykujuć i za rečy, nie źviazanyja ź jaje tvorčaściu. Jaje bahaćcie, pa danych Forbes, składaje kala 1,6 młrd dalaraŭ. Jana lotaje na pryvatnym samalocie — i heta nie padabajecca tym, chto pieražyvaje za ekałohiju. Krytyku vyklikała i markietynhavaje partniorstva z bankam Capital One, niekatoryja klijenty jakoha atrymlivali rańni dostup da biletaŭ.
Žurnalistka i fanatka Śvift Šenan Pałus u artykule dla Slate ŭ 2022 hodzie napisała, što Eras Tour pakazaŭ «najmienš prykolnuju viersiju Śvift na siońniašni dzień: Kapitalistka Tejłar». Jana paskardziłasia, što paśla niekalkich hadzin čakańnia ŭ anłajn-čarzie adzinym dastupnym varyjantam byŭ śpiecyjalny pakiet koštam 755 dalaraŭ.
«Heta jaje fanaty, tyja, z kaho jana vyciahvaje hrošy, i dla niekatorych z nas prośba zapłacić sotni dalaraŭ, kab ubačyć jaje ŭžyvuju… ahałomšvaje», — pisała jana.
U minułym hodzie jaje krytykavali za toje, što jana zanadta doŭha nie vykazvała padtrymku nivodnamu z bakoŭ na prezidenckich vybarach u ZŠA.
Kali jana ŭsio ž padtrymała demakratku Kamału Charys, na jaje abrynułasia krytyka z boku respublikancaŭ — uklučajučy samoha Donalda Trampa, jaki napisaŭ na svajoj płatformie Truth Social: «Ja NIENAVIDŽU TEJŁAR ŚVIFT!»
Pa słovach Sirysany, krytyka z usich bakoŭ — niepaźbiežny vynik biesprecedentnaha pośpiechu Śvift: «Karonu nasić nialohka. Čym značniej ty stanovišsia, tym bolš na ciabie hladziać».
Ale analityki sychodziacca ŭ mierkavańni, što navat kali papularnaść Śvift i pojdzie na spad, to jašče nie chutka. A novy albom amal napeŭna ŭstaluje novyja rekordy.
I — pa mienšaj miery siońnia — my praciahvajem žyć u suśviecie Tejłar Śvift.
Litoviec Vitalijus Mockus zaniaŭ pasadu Stryžaka ŭ «Bajsole». Chto heta taki?34
Kamientary
Taksama ni čuł ni viedaju i navat nima žadańnia)))