Rasiejskija specsłužby vykradajuć biełarusaŭ?

Svajaki asudžanych u Rasiei žycharoŭ Rečycy Andreja Šurpača j Siarhieja Trukšanina damahajucca pierahladu spravy. Baćki j niekatoryja pravaabaroncy śćviardžajuć, što biełaruskich hramadzianaŭ vyvieźli ź Biełarusi rasiejskija specsłužby z parušeńniem zakanadaŭstva. A heta, miarkujuć svajaki, stavić pad sumnieŭ abhruntavanaść prysudu.

Branski sud susiedniaj Rasiei asudziŭ Andreja Šurpača da pažyćciovaha źniavoleńnia, Siarhieja Trukšanina – da 20 hadoŭ turmy. Ich abvinavacili ŭ ciažkim złačynstvie – vybuch aŭtamašyny z dvuma supracoŭnikami rasiejskaj milicyi, jakija zahinuli. Taksama była paranienaja žančyna, jakaja vypadkova akazałasia la miesca trahiedyi.

Maci Andreja Šurpača Halina raspaviała, što letaś jaje syna zatrymali rasiejskija specsłužby paśla taho, jak jon pozna ŭviečary vyjšaŭ z Rečyckaha rajadździełu milicyi.

(Šurpač: ) «Kali moj syn vinavaty, čamu jany jaho nie aryštavali, nie pasadzili, kali ŭ ich byli dokazy? Jany skrali čałavieka z terytoryi Biełarusi, vyvieźli j sfabrykavali spravu. Ja padavała ŭ vyšuk, što ŭ mianie prapaŭ syn. I tolki praź dziesiać dzion mnie paviedamili, što jon znachodzicca ŭ Klincach u pryjomniku-raźmierkavalniku dla bamžoŭ».

Prykładna hetak ža zatrymali paźniej u Homielskim techničnym universytecie i Siarhieja Trukšanina. Raspaviadaje śviedka, spadar Alaksandar:

(Alaksandar:) «My zdavali ekzameny va ŭniversytecie. Siarhiej zdaŭ i vyjšaŭ pieršym, ja – za im. Kali Siarhiej padychodziŭ da chołu, jaho i zatrymali. Pavalili na padłohu ŭčatyroch, nadzieli kajdanki, vyvieli j pasadzili ŭ aŭtamašynu. Usie byli ŭ cyvilnym».

Vykanaŭca abaviazkaŭ načalnika Rečyckaj milicyi Pavał Ryžko paviedamiŭ, što letaś supracoŭniki adździełu sapraŭdy vyklikali Andreja Šurpača na hutarku, ale adpuścili. Pra zatrymańnie jaho ŭ Rečycy rasiejskimi milicyjantami infarmacyi načalnik nia maje:

(Ryžko: ) «My takoj infarmacyi nia majem, što rasiejskaja milicyja zatrymała jaho ŭ nas i vyviezła ŭ Rasieju. Našy supracoŭniki ŭ hetym nia ŭdzielničali. My zvanili ŭ Bransk, u Klincy, nam skazali, što jaho zatrymali tam, na terytoryi Rasiei», – paviedamiŭ kiraŭnik rečyckaj milicyi.

Spravaj asudžanych u Bransku byłych studentaŭ z Rečycy zacikavilisia biełaruskija pravaabaroncy. Havoryć vykanaŭčy dyrektar Biełaruskaha Chelsyinskaha kamitetu Aleh Hułak:

(Hułak: ) «My pakul nia kažam pra abhruntavanaść prysudu. Pakul nas cikavić prablema z vykradańniem ludziej rasiejskaj milicyjaj z terytoryi Biełarusi. Heta parušeńnie i našaha zakanadaŭstva, i kanvencyi ab pravavoj dapamozie, jakaja isnuje ŭ miežach SND. Pakul my bačym, što milicyja i prakuratura nia chočuć razabracca ŭ hetaj spravie».

❏

U zastaŭcy vykarastanaje fota photo.bymedia.net

• 0
• 0
• 0
• 0
• 0
• 0
• 0
• 0