Ivanoŭ zaŭždy hatoŭ

Suśvietnuju presu ablacieła zroblenaja ŭ Miunchenie zajava rasiejskaha vice-premjera i ministra abarony Siarhieja Ivanova: kali ŭ časie vybaraŭ u Biełarusi pačnucca zabureńni, Maskva budzie «reahavać admoŭna». A ŭvohule — «musim zrabić usio», kab takoha nia zdaryłasia.

Naturalna, heta najpierš rytoryka. Ciažka ŭjavić, kab vakoł Karła Marksa, 38 natapyrylisia rulami tanki Tamanskaj dyvizii ci pskoŭskija desantniki.

Mesydž bolej skiravany na zachodnikaŭ, jakija apošnimi tydniami demanstracyjna pryłaščyli Milinkieviča. Bo paralelna Brusel dy Strasburh raz-poraz rytualna zaklinajuć, kab Kreml paspryjaŭ demakratyčnym źmienam u Biełarusi. Voś Ivanoŭ i adkazaŭ: aha, zaraz!

Hłybiejšy padtekst taki: lepiej nia leźcie ŭ biełaruski harod sa svaim demakratyčnym ryłam, bo heta naša ziamla!

Skažacie, zhuščaju farby? Tady pahladziecie interviju Ivanova «Frankfurter Allgemeine Zeitung» (dadzienaje, treba dumać, akurat padčas hetaha vizytu ŭ Niamieččynu). Tam rasiejski dziejač jašče bolej ščyry. Tanny haz dla lepšaha chaŭruśnika jon, naprykład, patłumačyŭ tym, što «Rasieja jość ułaśnicaj transpartnaj systemy ŭ Biełarusi».

Dla Łukašenki, jaki zajaŭlaje, što za śpinaj narodu nikomu ničoha nie addaŭ i nie addaść, heta, peŭna, vialikaja navina. Bo rasiejcy vałodajuć u nas tolki adrezkam «Jamała—Eŭropy», ale ž nie «Biełtranshazam». Ci my čahości nia viedajem?

A voś vam jašče adna perlina ad Ivanova: «Biełarusy i rasiejcy ŭ pryncypie adziny narod. I my stvarajem sajuznuju dziaržavu, nia nadta chutka, ale meta zastajecca».

Jakaja meta, zdahadacca niaciažka. Ivanoŭ ź jahonym eŭrapiejskim hlancam dy dobraj anhielskaj movaj faktyčna praklamuje zamšełyja tezy vialikadziaržaŭnaha šavinizmu. Kažuć —«intehracyja», a majuć na ŭvazie — «inkarparacyja».

Padkreślim: našu krainu razhladaje jak votčynu nie jakiści marhinał-radykał, a imavierny pierajemnik Pucina, budučy haspadar Kramla.

I heta nie ekspromt. U studzieni toj samy Ivanoŭ vystupiŭ u «The Wall Street Journal» z prahramnym artykułam «Rasieja pavinna być mocnaj». Jon naŭprost zajaviŭ: «Sytuacyja ŭ peŭnych kraniach SND i rehijonach pobač ź imi — hałoŭnaje, što vyklikaje ŭ nas zakłapočanaść». Zbrojaj ža zabieśpiačeńnia imperskich intaresaŭ zamiest iržavych rakiet stanovicca haz. Nie vypadkova i ŭ miunchenskich vykazvańniach Ivanova prablemy biaśpieki nadta pieraplecienyja z hazavymi. Heta novaja kancepcyja «vialikaj Rasiei».

Maskoŭskija ahladalniki adznačajuć: prahramny vystup u pytańniach, što vychodziać za miežy kampetencyi siłavoha ministra, moh adbycca tolki paśla admaški Pucina.

Naturalna, što biespardonnyja pasažy aburyli apazycyjaneraŭ-niezaležnikaŭ. Ale ci daspadoby zajavy Ivanova dziejnamu biełaruskamu kiraŭniku — taksama vialikaje pytańnie. Bo padtekst moža być i taki: my ciabie, viadoma, padtrymajem, ale ž hladzi — pa rachunkach treba raźličvacca... Ci vypadkova ŭ apošnich Łukašenkavych pramovach hučyć pradčuvańnie hazavaj vajny?

Navat ciapierašniaj uładzie ivanovy na tankach tut nie patrebnyja. Naša niezaležnaść užo adbyłasia. A ŭžo kali da jaje dadasca demakratyja, to košty na haz niejak pieratryvajem. Daj boh, kab heta była adzinaja płata.

• 0
• 0
• 0
• 0
• 0
• 0
• 0
• 0