Anarchist Dziadok: «Usim raty nie zatkniecie»

Na pracesie nad minskimi anarchistami abvinavačanyja vystupili z apošnim słovam. Abviaščeńnie ž prysudu pryznačana na 27 maja na 14.00.

Mikałaj Dziadok: «Nie liču nieabchodnym dakazvać svaju nievinavataść. Liču, što jana była dakazana padčas śledstva». Jon padziakavaŭ rodnym i paplečnikam za dapamahu ŭ źniavoleńni. Maŭlaŭ, bieź ich padtrymki było b ciažka.

«Usim vy raty nie zatkniecie, usich nie pierasadžajecie!»

— tak źviarnuŭsia Dziadok da «karnych orhanaŭ».

Małady čałaviek nieadnarazova na pracesie paviedamlaŭ, što da jaho vykarystoŭvaŭsia cisk u časie dopytaŭ. Tak, u vieraśni 2010 hoda, da vystaŭleńnia abvinavačvańnia, jaho pieravieźli ź izalatara na Akreścina ŭ Žodzina. Tam pratrymali 12 hadzin i viarnuli nazad. I pačali novy dopyt. Pa słovach Dziadka, na toj momant jon nie spaŭ dvoje sutak. U toj dzień jamu było vystaŭlena i abvinavačvańnie.

Ihar Alinievič skazaŭ, što jaho vina nie była dakazana. Jon pierakanany, što ŭ našaj krainie moža być abvinavačany kožny anarchist, udzielnik ruchu ci tolki spačuvajučy, biez padstaŭ. Pa mierkavańni Alinieviča, padčas usiaho suda jaho sprabavali zrabić arhanizataram usich akcyj biez dokazaŭ na toje.

Alaksandr Franckievič adznačyŭ, što za tyja dzieviać miesiacaŭ, što znachodzicca za kratami, praź jaho kamieru prajšli kala 300 čałaviek. I jon paznajomiŭsia sa šmatlikimi historyjami. Tamu nie spadziajecca, što jaho mohuć apraŭdać. «Ja viedaju, jak u nas usio robicca». Maŭlaŭ, sud nie źjaŭlajecca niezaležnaj strukturaj.

«Naš praces maje palityčny charaktar. Usie sudy ŭ Biełarusi nosiać palityčny charaktar».

Franckievič ličyć, što praces nad anarchistami prachodzić u adnym šerahu z pracesami nad udzielnikami padziej 19 śniežnia. Jon ŭpeŭnieny, što hety sud pavinien zapužać, pastavić u peŭnyja ramki ludziej, jakija adnosiać siabie da anarchičnaha ruchu.

Franckievič taksama paviedamiŭ, što padčas śledstva jamu prapanoŭvali ahavaryć Dziadka. A kali jon admoviŭsia, to jaho vyrašyli pasadzić.

Maksim Vietkin i Jaŭhien Silivončyk i ŭ apošnim słovie pryznali siabie častkova vinavatymi. Jany paprasili abmiežavacca ŭmoŭnym terminam biez pazbaŭleńnia voli.

Nahadajem, što

prakuror paprasiŭ dla abvinavačanych ad 3 ad 9 hadoŭ.

Ihar Alinievič — 9 hadoŭ kałonii ŭzmocnienaha režymu z kanfiskacyjaj aŭtamabila.

Mikałaj Dziadok — 6 hadoŭ kałonii ŭzmocnienaha režymu.

Alaksandr Francievič — 5 hadoŭ kałonii ŭzmocnienaha režymu.

Jaŭhien Silivončyk — 3 hady abmiežavańnia svabody z nakiravańniem u papraŭčuju ŭstanovu adkrytaha typu.

Maksim Vietkin — 4 hady abmiežavańnia svabody z nakiravańniem u papraŭčuju ŭstanovu adkrytaha typu.

***

Zhodna z abvinavačańniem prakurora, Mikałaj Dziadok abvinavačvajecca ŭ arhanizacyi antymilitarysckaha šeścia pad Hienieralnym štrabam Respubliki Biełaruś 19 vieraśnia 2009 h. (č.2 art.339 KK), napadzie na kazino «Šanhry Ła» 5 śniežnia 2009 h. (č.2 art.339 i č.2 art.218 KK), na budynak Fiederacyi prafsajuzaŭ 30.04.2010 h. (č.2 art.339 i č.2 art.218 KK).

Ihara Alinieviča abvinavačvajuć u arhanizacyi antymilitarysckaha šeścia pad Hienieralnym štrabam Respubliki Biełaruś 19 vieraśnia 2009 h. (č.2 art.339 KK), napadzie na kazino «Šanhry Ła» 5 śniežnia 2009 h. (č.2 art.339 i č.2 art.218 KK), padpale dźviarej filijała «Biełarusbanka» 31.05.2010 h. (č.2 art.339 i č.3 art.218 KK), napadzie na pasolstva Rasii ŭ Minsku 30 žniŭnia 2010 h. (č.2 art.339 i č.3 art.218 KK) i napadzie na izalatar na Akreścina 6 vieraśnia 2010 h. (č.2 art.339 i č.2 art.218 KK).

Alaksandr Franckievič vinavacicca ŭ arhanizacyi antymilitarysckaha šeścia pad Hienieralnym štrabam Respubliki Biełaruś 19 vieraśnia 2009 h. (č.2 art.339 KK), napadzie na aporny punkt milicyi ŭ Salihorsku 9 sakavika 2010 h. (č.2 art.339 i č.2 art.218 KK) — zdymaŭ na videa, na budynak Fiederacyi prafsajuzaŭ 30.04.2010 h. (č.2 art.339 i č.2 art.218 KK), uzłomie sajta harvykankama Navapołacka (č.2 art.349, art.354, č.2 art. 351 KK).

Maksim Vietkin abvinavačvajecca ŭ padpale dźviarej filijała «Biełarusbanka» 31.05.2010 h. (č.2 art.339 i č.3 art.218 KK) — zdymaŭ na videa, napadzie na rasijskaje pasolstva 30 žniŭnia 2010 h. (č.2 art.339 i č.3 art.218 KK).

Jaŭhien Silivončyk vinavacicca ŭ napadzie na aporny punkt milicyi ŭ Salihorsku 9 sakavika 2010 h. — raźbiŭ škło prentam (č.2 art.339 i č.2 art.218 KK).

Dziadok, Franckievič i Alinievič viny nie pryznajuć, Vietkin i Silivončyk — častkova (nie było namieru psavańnia majomaści).

• 0
• 0
• 0
• 0
• 0
• 0
• 0
• 0