Sakretna. Pucinu. Prajekt "Biełaruski Janukovič"
Ci stanie Maskva farsavać scenar źmieny ŭłady ŭ Miensku? Razvažaje ŭ svaim błohu Alaksandar Kłaskoŭski.
U siońniašniaj medyjnaj vajnie miž "subjektami sajuznaje dziaržavy" kalasalnaja pieravaha, naturalna, na baku Rasiei. Spačatku trochi "abvastryli" asobnyja Łukašenkavy vykazvańni ŭ naftavych pytańniach (maŭlaŭ, anuluje pahadnieńni!). A potym, kali Miensk staŭ udakładniać, jašče i źvierchu dali ździeklivymi zahałoŭkami kštałtu "Biełaruś abviarhaje słovy svajho lidera".
Karaciej, na vajnie jak na vajnie. Maskva vykarystoŭvaje faktyčna tyja samyja pryjomy, što doŭhi čas praktykavalisia biełaruskaj prapahandaj u dačynieńni da ŭnutranych apanentaŭ. Zaraz ajčynnyja ŭłady apynulisia ŭ ichniaj skury pierad razzłavanaj imperyjaj.
Ale ŭźnikaje voś jakoje pytańnie: ci jość hety medyjny abstreł artyleryjskaj padrychtoŭkaj da niejkich radykalnych dziejańniaŭ Kramla na biełaruskim kirunku?
Voś maskoŭski palitolah Karahanaŭ paškadavaŭ dniami: maŭlaŭ, zmarnavali čas, nie hadavali ŭ susiedniaj krainie prarasiejskaj elity! Treba choć ciapier nie spyniacca na paŭdarozie...
Dyk ci pačnie zaraz ažyćciaŭlacca prajekt "biełaruskaha Janukoviča"?
Mienski analityk Valer Karbalevič upeŭnieny: dalnabojnych zadačaŭ takoha kštałtu Kreml pakul što nia stavić.
Na dumku analityka, adzinaja asensavanaja zadača, jakuju rasiejskaje kiraŭnictva ŭziałosia realizoŭvać, chaj sabie trochi i niaŭkludna, — heta skaračeńnie subsydyjaŭ. Što ž da źmieny ŭłady, to Maskva, ličyć Karbalevič, naŭrad ci stanie farsavać adpaviedny scenar. Pa-pieršaje, šmat roznych tarmazoŭ: svaje vybary i h.d. Pa-druhoje, dośvied postsavieckaha absiahu pakazaŭ: u takija hulni na čužym poli rasiejcy hulać nia ŭmiejuć.
Sapraŭdy, chiba nie "pralacieŭ" ŭ 2004-m Juščankaŭ kankurent, jakoha łabijavaŭ asabista Pucin? Siońnia ž, zajmieŭšy narešcie važkija paŭnamoctvy, Janukovič nie vyhladaje nadta pramaskoŭskim. Chutčej sprabuje siadzieć na dvuch kresłach (ci lacieć na dvuch kryłach, karystajučysia bolej vytančanaj metafaraj Łukašenki).
Tak što zapuskać scenar źmieny ŭłady ŭ Biełarusi dla Maskvy ryzykoŭna. Što atrymajecca na vychadzie — heta jašče babula nadvaja varažyła.
Pakul što Kreml budzie reahavać na biełaruski siužet chutčej sytuacyjna.
Łukašenka heta adčuvaje. Tamu i staŭ davodzić, što svarycca z Rasiejaj nie źbirajecca, ale ž hodzie lacieć na adnym kryle!
De-fakta heta aznačaje sprobu łaviravać miž Maskvoj i Bruselem. Analityk Andrej Suzdalcaŭ, badaj, idealizuje stasunki miž hetymi centrami, śćviardžajučy, što jany "zaŭždy damoviacca". I zdolnyja, maŭlaŭ, za ličanyja tydni vyrašyć los pieršaha biełaruskaha prezydenta (naturalna, nie na jahonuju karyść).
Łukašenka nie adnojčy demanstravaŭ majsterstva praślizvać miž Scyłaj dy Charybdaj. Zaraz varunki dla jaho, kaniešnie, ekstremalnyja. Ale ž niezdarma aficyjny kiraŭnik ćvierdzić: daj boh kožnamu prezydentu takuju apazycyju!
Jość dźvie najaktualniejšyja prablemy, jakija apazycyja pakul što nie asensavała, ličyć Valer Karbalevič.
Pa-pieršaje, heta novaja sacyjalna-ekanamičnaja sytuacyja. (Sapraŭdy, stolki času pradrakali hety ŭschodni abłom, a jak dajšło da spravy — ni be ni me ŭ sensie vyraznaj alternatyŭnaj kancepcyi!)
Pa-druhoje, vyklikam jość Łukašenkavy sproby pačać balansavańnie miž Maskvoj i Zachadam. Anemičnaj apazycyi, u jaki bok ni zirni, zastajecca amplua treciaha lišniaha.
Nu a Maskva... Mienavita maskoŭski palitolah Sataraŭ sarkastyčna kaža: "Rasieja pakazała zuby, a heta akazałasia ŭstaŭnaja skivica, jakuju zvyš taho efektna vybili" :)
Va ŭsiakim razie, najbližejšym časam sprava, badaj, abmiažujecca medyjnymi abstrełami.
Namioki, što tam užo namacvajuć "biełaruskaha Janukoviča", — badaj, taksama ź pijaraŭskaj abojmy.
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ56
Kamientary