Na narviežca Alaksandra Dali Ojena ŭskładalisia vialikija nadziei na Alimpijadzie ŭ Łondanie.
Čempijon śvietu pa płavańni narvieh Alaksandr Dali Ojen raptoŭna pamior u ZŠA ŭ 26 hadoŭ. U lipieni 2011 hoda Dali Ojen zavajavaŭ załaty miedal u stomietroŭcy brasam na čempijanacie śvietu pa płavańni ŭ Šanchai.
Pozna ŭviečary ŭ paniadziełak jon byŭ znojdzieny nieprytomnym u dušy paśla treniroŭki ŭ horadzie Fłahstaf (Aryzona).
Siabry, jakija bačyli ź im niezadoŭha da śmierci, kažuć, što jon vyhladaŭ zdarovym.Chutkaja dapamoha prybyła na miesca na praciahu niekalkich chvilin, ale joj nie ŭdałosia viarnuć spartoŭca da žyćcia.
Prezident narviežskaj fiederacyi pa płavańni Pier Runie Eknies skazaŭ, što ŭ płyŭca spyniłasia serca.
Alaksandr Dali Ojen pryvioz u Narviehiju pieršy alimpijski miedal u płavańni, zavajavaŭšy sierabro ŭ Piekinie-2008.
Jon staŭ sapraŭdnym natchnialnikam dla płyŭcoŭ pa ŭsioj krainie, šmatlikim ź jakich prychodzicca sutykacca z drennymi ŭmovami dla trenirovak i małym finansavańniem.
Dadajcie da hetaha małady ŭzrost Dali Ojena i viadomy ŭsim pryjazny charaktar. Jaho zaŭčasnaja śmierć vyklikała šok u Narviehii.
Premjer-ministr krainy Jens Stołtenbierh vykazaŭ ŭsieahulnaje mierkavańnie: «Maleńkaja kraina straciła vialikaha spartoŭca».
U apošnim paviedamleńni, adpraŭlenym spartsmienam u Twitter u paniadziełak pierad zakančeńniem zboraŭ u ZŠA, jon napisaŭ:
«Nam zastałosia pravieści dva dni ŭ łahiery ŭ Fłahstafie, a potym — nazad u samy vydatny horad u Narviehii Bierhien».
Na vystup Ojena na Hulniach u Łondanie ŭskładalisia vialikija nadziei.
Svoj załaty miedal u Šanchai Dali Ojen zavajavaŭ praź niekalki dzion paśla trahiedyi ŭ Narviehii, dzie Anders Brejvik zabiŭ 77 čałaviek u Osła i na vostravie Utoja. Spartoviec zajaviŭ, što heta było dla jaho dadatkovaj matyvacyjaj: «My nie možam dazvolić hetamu chłopcu razburyć našu budučyniu».
Kamientary