Ivan Amielčanka patłumačyŭ žurnalistam matyvy svajho ŭčynka.
Pakul Ivana Amielčanku ŭžo bolš za tydzień šukaje milicyja, jon adpačyvaje daloka ad Miensku. Našyja žurnalisty sustrelisia z aŭtaram płakatu «musorok», jaki nie padajecca asabliva ŭschvalavanym pavyšanaj uvahaju pravaachoŭnikaŭ.
Na sioletnim «Čarnobylskim šlachu» 25-hadovy Ivan Amielčanka z samarobnym płakatam staŭ kala słužboŭca ŭ cyvilnym, jaki zdymaŭ akcyju na videa. Žart maładoha čałavieka chutka staŭsia chitom internetu, adnak kalehi «musorka» humaru nie acanili.
Užo na nastupny dzień ź im vykazaŭ žadańnie parazmaŭlać učastkovy, adnak nie moh patłumačyć, navošta vyklikajuć Amielčanku, tamu toj na spatkańnie nie pryjšoŭ. Paśla taho, jak małady čałaviek źjechaŭ ad haradskoj mituśni dy pakryŭdžanych ludziej u cyvilnym na pryrodu, telefanavali jahonaj maci. Žančynie paviedamili, što jejnaha syna vyklikajuć jak śviedku ŭ spravie... masavych biesparadkaŭ 19 śniežnia 2010 hoda. Nahadajem, što spravu ŭžo daŭno zakryli.
Sam Ivan pomsty nie baicca i spadziajecca abyścisia niekalkimi sutkami, chacia nie vyklučaje, što jaho mohuć i źbić u pastarunku.
«Nu, jak heta byvaje, vyklikajuć na niejkuju razmovu, składuć pratakoł, niejki milicyjant budzie śviedkam. Ja zrabiŭ heta, bo mianie zadziaŭbło, što našaja milicyja chodzić u cyvilnym, nie nazyvajecca i robiać taki vyhlad, što ich nibyta i niama. Kab i jany pabačyli, što ich zaŭsiody bačna — hetyja hładka paholenyja tvary, načyščanyja boty, u pinžačku, z kamieraju, z hetkim navušnikam, dzie jon čuje ŭsie zahady. Ja nie škaduju. Mnie padajecca, heta było vielmi viesieła», — upeŭnieny małady čałaviek.
Darečy, Amielčanka užo traplaŭ na 15 sutak padčas letašnich akcyjaŭ maŭklivaha pratestu.
Pavodle pravaabaroncy Uładzimira Łabkoviča, pieraśledavać maładoha čałavieka niama padstavaŭ, bo pracaŭnik milicyi nijak nie akreśliŭ svaju prynaležnaść da pravaachoŭnych orhanaŭ. Za jaho heta zrabiŭ Ivan.
«Farmalna jany, kaniečnie, mohuć raspačać zakrytuju kryminalnuju spravu. Ale ja dumaju, što sprava idzie nie ŭ hetym kirunku, a ŭ takim tradycyjnym, kab pryciahnuć da administracyjnaj. A heta — prosta kab papužać, naŭrad ci ŭ nas paboleje asudžanych u spravie 19 śniežnia», — miarkuje pravaabaronca.
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie1
Kamientary