Try rasijskija viedamstvy buduć analizavać reekspart naftapraduktaŭ Biełaruśsiu

Vice-premjer Rasii Arkadź Dvarkovič, jaki kuryruje va ŭradzie pytańni PEK, daručyŭ profilnym viedamstvam praanalizavać situacyju z ekspartam naftapraduktaŭ ź Biełarusi ŭ trecija krainy. Pra heta paviedamiŭ žurnalistam kiraŭnik Minenierha RF Alaksandr Novak 15 červienia ŭ Sankt-Pieciarburhu, dzie prachodzić biźnies-forum «Adzinaja ekanamičnaja prastora: Novyja mahčymaści pramysłovaha raźvićcia».

Pavodle jaho słoŭ, 13 červienia Dvarkovič pravioŭ naradu, pavodle vynikaŭ jakoj Ministerstvu pramysłovaści sumiesna ź Minekanamraźvićcia i Minenierha daručana praanalizavać situacyju z pastaŭkami naftapraduktaŭ ź Biełarusi.

«My majem uskosnyja źviestki nakont pavieličeńnia abjomaŭ ekspartu mienavita rastvaralnikaŭ, tamu dla taho, kab heta było paćvierdžana, treba pravodzić pracu bolš pilna», — cytuje Novaka RIA Novosti.

Treba adznačyć, što ŭ adpaviednaści ź dziejnymi pahadnieńniami Biełaruś u abmien na biaspošlinnuju naftu i naftapradukty abaviazana pieraličvać u rasijski biudžet pošliny ad ekspartu naftapraduktaŭ za miežy Mytnaha sajuza.

6 červienia na pres-kanfierencyi ŭ Minsku pasoł RF Alaksandr Surykaŭ zajaviŭ: rasijski bok źviarnuŭ uvahu na toje, što impart rasijskich naftapraduktaŭ Biełaruśsiu apošnimi hadami značna vyras, u tym liku ŭ 2012 hodzie — u čatyry razy.

Kamientujučy infarmacyju ab tym, što Biełaruś zajmajecca reekspartam rasijskich naftapraduktaŭ pad vyhladam razbavicielaŭ i rastvaralnikaŭ z metaj paźbiehnuć vypłaty ekspartnaj pošliny ŭ rasijski biudžet, Surykaŭ skazaŭ: «My razumiejem, što Biełaruś impartuje bolš, čym treba dla ŭnutranaha spažyvańnia. Zaŭvažyli, što ŭ spravazdačnaści Mytnaha sajuza źjavilisia rastvaralniki i razbavicieli, jakija nie abkładajucca pošlinami. Letaś ich było dva miljony ton».

Pavodle słoŭ Surykava, hetym pytańniem zajmajucca adpaviednyja ekanamičnyja struktury ŭ RF. «Napeŭna jano budzie abmiarkoŭvacca ź biełaruskim bokam, kab nie było parušeńniaŭ z reekspartam. Reekspartavać možna, ale, kali łaska, zapłacicie pošlinu», — padkreśliŭ pasoł.

14 červienia staršynia Dziaržaŭnaha mytnaha kamiteta Biełarusi Alaksandr Špileŭski zajaviŭ žurnalistam, što ŭsie pastaŭki naftapraduktaŭ ź Biełarusi adbyvajucca ŭ adpaviednaści z padpisanymi z Rasijaj pahadnieńniami.

«Nijakich niezakonnych pastavak za miažu niama i być nie moža. Aficyjna zajaŭlaju, što ŭsio, što ŭvachodzić i vychodzić z krainy, znachodzicca pad žorstkim kantrolem», — skazaŭ Špileŭski, dadaŭšy, što «pradstaŭniki rasijskaha boku, jakija znachodziacca ŭ Minsku, pretenzij nie vykazvali».

• 0
• 0
• 0
• 0
• 0
• 0
• 0
• 0