Nacbank: Čutki pra novuju devalvacyju — prosta łuchta

Infarmacyju pra zapłanavanuju ŭ Biełarusi novuju devalvacyju — da 15 tysiač rubloŭ za dalar ZŠA — u Nacyjanalnym banku nazvali «adkrytym tryźnieńniem».

Źviestki pra toje, što rašeńnie ab praviadzieńni novaj devalvacyi było pryniata na dniach na zakrytaj naradzie, raspaŭsiudziŭ ranicaj 30 lipienia sa spasyłkaj na krynicu ŭ Nacbanku internet-resurs«Biełaruski partyzan».

Pavodle infarmacyi krynicy, na naradzie abmiarkoŭvalisia nastupstvy pavyšeńnia siaredniaha zarobku da 500 dalaraŭ, i asnoŭnym vynikam stała «pryniaćcie rašeńnia ab praviadzieńni novaj devalvacyi».

«Adzin ź vierahodnych scenaraŭ maje na ŭvazie daviadzieńnie kursu rubla da 15 tysiač za dalar», — paviedamiŭ ananimny čynoŭnik.

«U jakaści abhruntavańnia praviadzieńnia novaj devalvacyi prapaniecca paviedamlać nasielnictvu, što devalvacyja spryjalna adbivajecca na eksparcie pradukcyi, dazvalaje mieć pazityŭnaje salda płaciežnaha bałansu i pahašać źniešnija daŭhi, — cytuje internet-resurs surazmoŭcu. —

Adzin čynoŭnik z Administracyi taksama ŭnios prapanovu zapuścić „kačku“, što nibyta devalvacyju spravakavali zamiežnyja kampanii z metaj skupki za biascenak biełaruskich pradpryjemstvaŭ».

Paviedamlajecca taksama, što «ŭ jakaści asnoŭnaj miery kantrolu nad situacyjaj na pasiadžeńni razhladałasia pytańnie zamarozki ŭkładaŭ i abmiežavańni pa źniaćci najaŭnaści ŭ bankamatach», što, pa dadzienych krynicy ŭ Nacbanku, moža adbycca «ŭžo ŭ kastryčniku».

«Ja bačyŭ hetuju infarmacyju, ale adkrytaje tryźnieńnie my nie kamientujem», — zajaviŭ BiełaPAN pres-sakratar Nacbanka Alaksandr Cimašenka. Jon taksama admoviŭsia kamientavać sam fakt praviadzieńnia zakrytaj narady.

Nahadajem, pieršaja devalvacyja nacyjanalnaj valuty adbyłasia ŭ Biełarusi 2 studzienia 2009 hoda, kali kurs rubla da dalara byŭ źnižany na 20,45%. Nastupnaja devalvacyja, na 56,3%, była praviedziena 24 maja 2011 hoda.

14 vieraśnia taho ž hoda de-fakta adbyłasia jašče adna devalvacyja, kali pa vynikach pieršaj dadatkovaj handlovaj siesii na Biełaruskaj valutna-fondavaj biržy kurs dalara skłaŭ 8.600 biełaruskich rubloŭ, pieravysiŭšy u 1,6 razu aficyjny kurs, ustanoŭleny na asnoŭnych tarhach (5.355 rubloŭ).

Na siońniašni dzień kurs składaje 8.260 rubloŭ za dalar ZŠA. Pavodle prahnozaŭ Nacbanka, siaredniehadavy kurs pa vynikach 2012 hoda pavinien skłaści 9.150 rubloŭ za dalar.

• 0
• 0
• 0
• 0
• 0
• 0
• 0
• 0