76 dzion biełaruski palituciakač Alaksandr Barankoŭ pravioŭ u turmie ŭ Kita ŭ čakańni rašeńnia ab ekstradycyi.
Najvyšejšy sud Ekvadora razhladaje prośbu Biełarusi ab ekstradycyi Barankova, jakomu, pavodle jaho advakata Fiernanda Łara, u Biełarusi moža pahražać śmiarotnaje pakarańnie za zdradu radzimie.Nienazvanaja krynica ŭ sudzie paviedamiła ahienctvu AFP, što pastanova ab ekstradycyi moža być pryniataja najbližejšymi dniami.
Kali sud zadavolić prośbu biełaruskich uładaŭ, sprava pojdzie na razhlad prezidentu Ekvadora Rafaelu Karea.
Sprava Barankova ŭžo prahučała ŭ suśvietnych miedyjach — pra jaje paviedamili The Guardian, BBC, Sky News, The Washington Post, CNN, Miami Herald, infarmacyjnyja ahienctvy AFP i Ansa.
Ekvadorski druk źviartaje ŭvahu na padvojnyja standarty ekvadorskich uładaŭ u spravie nadańnia palityčnaha prytułku.
«Vypadak z Barankovym paradaksalnym čynam vyrašajecca ŭ toj samy momant, kali ŭrad Rafaela Karea daje dypłamatyčny prytułak zasnavalniku Wilileaks Džulijanu Asanžu, pryniaŭšy arhumienty pra mahčymuju pahrozu śmiarotnaha pakarańnia ŭ ZŠA», piša hazieta Hoy.
Kałumnist haziety El Comercio Marcin Pajares ŭ svaim kamientary pad zahałoŭkam «Raŭnańnie kryvadušnaści» sarkastyčna vykazvaje dumki prezidenta Rafaela Karea:
«Skažy, na kaho ty napadaješ, i ja skažu, ci ja dam tabie prytułak. Tvajo žyćcio ŭ niebiaśpiecy? Spačatku skažy čyj ty vorah — maich siabroŭ, ci maich vorahaŭ?.. Kali ty dakučaješ maim siabram, my možam pazbavić ciabie našaj abarony i viarnuć ciabie ŭ tvaju krainu, dzie ty možaš być pakarany śmierciu. A kali ty, jak Džulijan Asanž, robiš niepryjemnaści maim voraham, dyk my voźmiem ciabie pad našu abaronu. Ci chvaluje nas tvajo žyćcio? Cha!»
Barankoŭ, 30-hadovy błohier i były vajskoviec, pryjechaŭ u Kita ŭ kastryčniku 2009 hoda paśla taho, jak «vykazaŭ niazhodu z palitykaj prezidenta Alaksandra Łukašenki», jak jon zaznačyŭ u prośbie ab atrymańni palityčnaha prytułku.Status palituciekača jon atrymaŭ 27 červienia 2010 hoda. U tym samym biełaruskija ŭłady ŭžo źviartalisia da Ekvadora ab jahonaj ekstradycyi. Tady prośba była adchilena, bo Minsk nie daŭ usioj nieabchodnaj infarmacyi.
Sioleta 7 červienia Barankoŭ znoŭ byŭ zatrymany, kali Biełaruś paŭtorna źviarnułasia da Ekvadora z prośbaj ekstradycyi.
Pavodle advakata, novyja abaroty sprava pryniała paśla vizytu ŭ Ekvador Alaksandra Łukašenki 27-28 červienia.
Kamientary