Hienprakuratura: Biełaruś nie vydaść Kyrhyzstanu Žanybieka Bakijeva

Hienieralnaja prakuratura Biełarusi pakidaje biez zadavalnieńnia zapyt prakuratury Kyrhyzskaj Respubliki ab vydačy brata eks-prezidenta hetaj krainy Žanybieka Bakijeva.

«Z ulikam padziej, što adbylisia ŭ Kyrhyzskaj Respublicy, i charaktaru abvinavačvańniaŭ, što vystaŭlajucca Ž.Bakijevu, biełaruski bok miarkuje, što zapyt ab vydačy źviazany ź pieraśledam jaho pa prykmiecie palityčnych pierakanańniaŭ, tamu zapyt Hienieralnaj prakuratury Kyrhyzskaj Respubliki ab vydačy Ž.Bakijeva pakinuty biez zadavalnieńnia», — zajavili ahienctvu «Interfaks-Zachad» u Hienprakuratury Biełarusi ŭ sieradu.

Nahadajem, što abjaŭleny ŭ mižnarodny vyšuk Žanyš (Žanybiek) Bakijeŭ -- brat skinutaha prezidenta Kurmanbieka Bakijeva -- byŭ zaŭvažany i sfatahrafavany ŭ centry Minska 17 žniŭnia ź jašče dvuma padazravanymi ŭ trajnym zabojstvie.

Hałoŭnaje ŭpraŭleńnie kryminalnaha vyšuku MUS Kyrhyzstana zreahavała na hetyja foty, zajaviŭšy, što na zdymku «sfatahrafavanyja hramadzianie Kyrhyzskaj Respubliki, abjaŭlenyja ŭ miždziaržaŭny vyšuk, — były staršynia Słužby dziaržachovy Žanyš Bakijeŭ, a taksama jaho adnakurśnik i eks-namieśnik SDA Tachir Rysalijeŭ, 1957 hoda naradžeńnia, uradženiec Narynskaj vobłaści, i Rustam Sajdujeŭ, 1976 hoda naradžeńnia, uradženiec Džałał-Abadskaj vobłaści, blizki siabar Maksima Bakijeva».

Pavodle źviestak HUKV, usie troje źjaŭlajucca asnoŭnymi padazravanymi ŭ zabojstvie byłoha kiraŭnika Administracyi prezidenta Kyrhyzstana Miedeta Sadyrkułava, jaho vadziciela Kubata Sułajmanava i dyrektara Mižnarodnaha instytuta stratehičnych daśledavańniaŭ Siarhieja Ślepčanki.

22 žniŭnia MZS Kyrhyzstana vykazała zaniepakojenaść tym, što Žanyš Bakijeŭ svabodna pieramiaščajecca pa terytoryi Respubliki Biełaruś, jakaja źjaŭlajecca družalubnaj krainaj i ŭdzielnicaj vyšejzhadanaj kanviencyi, a taksama inšych mižnarodnych dahavoraŭ», — zajaviła MZS Kyrhyzstana.

Ranicaj 28 žniŭnia na pasolstva Biełarusi ŭ Biškieku napad učynili svajaki achviar dziaržaŭnaha pieravarotu 2010 hoda, jakija patrabavali ekstradycyi ź Minska bratoŭ Bakijevych [zrynuty prezident Kurmanbiek Bakijeŭ atrymaŭ u Biełarusi palityčny prytułak]. Udzielniki akcyi patrabavali spynieńnia pracy pasolstva i razryvu dypadnosin z uładami Biełarusi, jakija «chavajuć zabojcaŭ».

Zatym Kyrhyzstan adklikaŭ pasła Asanalijeva ź Minska.

Cikava adznačyć, što razam z tym Hienprakuratura Biełarusi ŭ pačatku hetaha tydnia narakała na toje, što Čechija nie zadavoliła nivodnaha zapytu Biełarusi ab ekstradycyi, a Polšča vydaje «pryblizna pałovu ad zapytanych». Pra heta zajaviŭ načalnik mižnarodna-pravavoha adździeła Hienieralnaj prakuratury Aleh Chłyščanka ŭ intervju haziecie «Sovietskaja Biełoruśsija»

«Pryčym čaściej za ŭsio [admaŭlajuć] pa nadumanych padstavach: nibyta ŭ nas u krainie miescy pazbaŭleńnia voli nie adpaviadajuć minimalnym pryncypam jeŭrapiejskaha pienitencyjarnaha prava pa pytańniach abychodžańnia sa źniavolenymi, u nas nie moža być akazana kampietentnaja pravavaja dapamoha, — skazaŭ tady Chłyščanka. — Ale ŭ nas z Čechijaj taksama jość dahavor, i my svaje abaviazacielstvy starajemsia vykonvać. Dla nas isnuje tolki zakon i niama nijakich palityčnych momantaŭ. Kali majucca zakonnyja padstavy dla vydačy złačyncy, my jaho vydajom, niama takich padstaŭ — admaŭlajem. Niadaŭna my pryniali rašeńnie ab vydačy Čechii hramadzianina Ukrainy dla pryciahnieńnia da kryminalnaj adkaznaści». Pavodle słoŭ pradstaŭnika Hienprakuratury, krainy SND admaŭlajuć u vydačy złačyncaŭ u adzinkavych vypadkach».

• 0
• 0
• 0
• 0
• 0
• 0
• 0
• 0