Barys Tumar. Prajhraje Biełaruś

Apazycyja prajhraje infarmacyjnuju vajnu

Prajhraje Biełaruś

Učorašni dzień pačynaŭsia horača. U Miensk byli tajemna pierakinutyja častki ŭnutranych i mabilnych siłaŭ z Horadni, Viciebsku, Marjinaj Horki. Z-za chmaraŭ vyzirała soniejka. Nad Drazdami krucilisia try hielikoptery. La Biełpałka byŭ aryštavany Aleś Kazak, lider Asacyjacyi resursavych centraŭ, jaki pilnavaŭ pieramiaščeńni vojskaŭ. Z Horadni, Bieraścia, Prapojsku, Voršy, Viciebsku, Mahilova dachodzili naviny pra niedapuščeńnie naziralnikaŭ na ŭčastki. U Bieraści rasiejskija žurnalisty zaŭvažyli adčynienuju skryniu dla daterminovaha hałasavańnia. “Niezaležnaje nazirańnie” ahučvaje źviestki: u Smurhoniach u subotu źnikła skrynia dla hałasavańnia, a ŭ Rečycy znajšli padpisanyja pratakoły z zaviedamaj pieramohaj Łukašenki.

Specsłužby častkova paralizavała dziejnaść “Niezaležnaha Nazirańnia” i apazycyjnych ŚMI, vyrubiŭšy Internet-sajty apazycyi (vo tabie i anarchičny Internet, jaki pracuje ŭ Biełarusi cieraz adzin kantralavany dziaržavaju kanał), zablakavaŭšy elektronnuju poštu, abłažyŭšy štaby Hančaryka i naziralnikaŭ, adłučyŭšy im telefony i parušyŭšy pracu mabilnaj suviazi. Specsłužby navat paadłučali telefony ŭ tych numarach hatelaŭ, dzie raźmiaścilisia zachodnija naziralniki, i paralizavali pracu spadarožnikavaj stancyi TBS, pryviezienaj zachodnimi telekanałami (vo tabie i Łukašenkavy słužby, jakija ŭ apazycyi šmat chto pahardliva mienavaŭ “kałchoznymi”).

U vyniku Łukašenka całkam vyjhraŭ infarmacyjnuju vajnu. I navat Radyjo Svaboda a 23-j nia mieła inšych ličbaŭ, aproč papiarednich Centravybarkamaŭskich, i, bolš za toje, analizavała ich. A paśla paŭnočy i “Svaboda” zmoŭkła, bo 6 hadzinaŭ viaščańnia, adviedzienyja im na viečar, skončylisia.

Dla prostaha biełarusa adzinaj krynicaj infarmacyi było telebačańnie, jakoje ad 22-j viečara pačało śviatkavać pieramohu Łukašenki. Harant kanstytucyi i suverenitetu prymaŭ vinšavańni j adkazvaŭ na vietłyja pytańni žurnalistaŭ, razvažajučy pra 11% hałasoŭ apazycyi.

Choć, badaj, nia tre było mieć vyšejšaj adukacyi, kab zadumacca, što nie mahli ŭ 22.30 padličyć u Miensku tolki 15% hałasoŭ, u Mienskaj vobłaści – 40%, a ŭ Viciebsku – cełych 60%. Bo ŭ Biełarusi adzin časavy pojas. Ale ž Rasieja nastolki ŭ nas u hałovach...

Na dvare cierusiŭ doždž, i 3 tysiačy čałaviek, što sabralisia na Kastryčnickaj płoščy, pacichu razychodzilisia, zmučanyja biez kanca paŭtaranaju pieśniaj Traćciakova “Dzie Hančar? Dzie Krasoŭski?” pa-rasiejsku i pa-biełarusku ŭpieramiežku z “Modern Talking” i “NRM” ź niejkich vypadkovych kasetaŭ. Kala paŭnočy na płoščy zastałasia tysiača samych zaciatych. A Ŭ.Hančaryk, niby S.Šarecki ŭ 96-m, zaklikaŭ sabranych prajaŭlać spakoj.

Biełaruskaja namenklatura nia zdužała pierajhrać Łukašenku. Adna “Chartyja'97” viała zmahańnie łukašenkaŭskimi ž pryjomami.

Kampanija adzinaha kandydata razhortvałasia mlava. Hramadztva ličyła jaho zastarym dla vysokaj pasady. Raźliki na dapamohu ci choć by neŭtralitet Maskvy raźlacielisia ŭščent. Dosyć vysoki pracent hałasoŭ byŭ padadzieny suprać usich kandydataŭ. Takija pieršyja vysnovy z vynikaŭ hałasavańnia.

Miž tym pieramoha PPRB zusim nie pierakanaŭčaja. Aficyjnyja źviestki kažuć pra bolš za 70% hałasoŭ, u štabie Hančaryka nazyvajuć ličbu 46%.

Navat kali nia vieryć da kanca ni tym, ni tym, vynikaje, što Łukašenka i daloka nia maje ahulnanarodnaje padtrymki.

Namieśnik staršyni KCHP-BNF U.Starčanka nazvaŭ aficyjnyja vyniki “absurdnymi”. Pradstaŭniki biełaruskich pravaabarončych arhanizacyjaŭ vykazali sumnieŭ u mahčymaści pryznańnia takich vybaraŭ lehitymnymi. V.Viačorka miarkuje, što nia ŭsiudy naziralnikam udałosia dapilnavać na etapie papiaredniaha nazirańnia i 9-ha. Unutranyja i zachodnija naziralniki sychodziacca na tym, što manipulacyi vynikami vybaraŭ byli istotnymi. U adnych Baranavičach, paviedamlaje kiraŭnik “Niezaležnaha Nazirańnia” pa horadzie sp.Hoŭša, było zafiksavana bolš za 50 parušeńniaŭ zakanadaŭstva. U Miensku na susiednich učastkach ličby skačuć na dziasiatki pracentaŭ. A.Trusaŭ pryvodzić śviedčańni naziralnikaŭ z roznych učastkaŭ Miensku, dzie stos biuleteniaŭ za Hančaryka byŭ vyšejšy za Łukašenkaŭ. A Hančarykaŭ vynik, abvieščany staršyniom kamisii, mienšy. “Siabry kamisijaŭ paśla byli šakavanyja nia mienš za naziralnikaŭ, jakich trymali voddal ad miesca padliku. Aproč taho, nichto nia viedaje navat dakładnaj kolkaści vybarcaŭ. Pra jaki padlik možna vieści havorku? Padmianialisia skryni, piačatki, ludzi ŭ skurankach pryludna ŭkidvali pački biuleteniaŭ. Ich chapali za rukavo naziralniki, a milicyja adpuskała, — kaža sp.Trusaŭ. — U zvodnych pratakołach nie vyviešvajecca kolkaść hałasoŭ, padadzienych “suprać usich”, što taksama pakazalna”.

Łukašenka vyjhraŭ nia vybary, a infarmacyjnuju vajnu. Canoju taho, što lehitymnaść biełaruskaje ŭłady iznoŭ budzie niapoŭnaja. Dziaržava Biełaruś na hetych vybarach prajhrała.

Barys Tumar