Блізкія і сябры хлопца, які загінуў на Валадарцы, ладзяць ля ізалятара хвіліну маўчання
Блізкія і сябры Ігара Пцічкіна, які загінуў у мінскім СІЗА № 1 па вул. Валадарскага, збіраюцца зладзіць ля будынка ізалятара ў суботу 14 верасня хвіліну маўчання, каб ушанаваць яго памяць.
Паведамленне пра хвіліну маўчання з’явілася ў суполцы Укантакце, прысвечанай Ігару Пцічкіну.
Раней у той самай суполцы паведамлялася, што хвіліна маўчання пройдзе на Кастрычнічкай плошчы, а 19:00 12 верасня, на 40 дзён ад смерці Пцічкіна.
21-гадовы Ігар Пцічкін мусіў адбыць у СІЗА трохмесячны арышт: сеў за руль аўто, хаця быў пазбаўлены правоў. 30 ліпеня ён прыехаў у Заводскае РУУС Мінска, каб адбыць пакаранне і затым быў дастаўлены ў СІЗА № 1 на Валадарскага.
4 жніўня Пцічкін памёр.
На сустрэчы з начальнікам СІЗА родным хлопца паведамілі, што ў Ігара 3 жніўня пачалося «псіхаматорнае ўзбуджэнне». І яго змясцілі ў медыцынскую часць, «дзе давялося фіксаваць яго мяккімі рамянямі». На фатаздымках трупа Пцічкіна заўважныя шматлікія сінякі. Фоты выкладзеныя ў агульны доступ у суполцы Укантакце.
Афіцыйная прычына смерці Пцічкіна пакуль не называецца. Працягваюцца экспертызы.
Каментары