Берасцеец перакідаў мігрантаў за мяжу з дапамогай троса, падвешанага за дрэвы

Суд Брэсцкага раёна 23 верасня вынес прысуд Віталю Каўшу за арганізацыю незаконнай міграцыі.

Як паведаміў памочнік пракурора Брэсцкага раёна Аляксандр Плышэўскі, які падтрымліваў дзяржаўнае абвінавачанне па справе, Коўш абвінавачваўся ў тым, што па папярэдняй змове з іншай асобай, крымінальная справа ў дачыненні да якой выдзелена ў асобную вытворчасць, з мэтай незаконнай міграцыі замежных грамадзян на тэрыторыю Польшчы спланаваў і арганізаваў незаконны ўезд у Беларусь з Расіі васьмі грамадзян Індыі.

Замежныя грамадзяне прыбылі на тэрыторыю Беларусі 6–7 мая 2012 года. Пасля гэтага грамадзяне Індыі былі перавезеныя ў вёску Цюхінічы Брэсцкага раёна, дзе было арганізавана іх укрывальніцтва ў доме па месцы жыхарства Каўша.

Паміж 7 гадзінамі 14 мая і гадзінай ночы 15 мая грамадзяне Індыі былі дастаўленыя ў лясны масіў, што паблізу заставы «Цярэбунь», дзе Коўш з іншай асобай забяспечылі нелегалаў рэчавымі мяшкамі і неабходнымі прыстасаваннямі для незаконнага перасячэння мяжы.

За ствалы дрэў быў замацаваны металічны трос, пасля чаго з выкарыстаннем мантажных паясоў грамадзяне Індыі былі перамешчаныя над сігналізацыйным комплексам для далейшага накіравання ў Польшчу.

У выніку супрацьпраўных дзеянняў сем індыйцаў былі перапраўленыя на нейтральную тэрыторыю мяжы Беларусі і Польшчы. Пасля ўсе восем парушальнікаў былі затрыманыя пагранічным нарадам.

Паводле слоў дзяржабвінаваўцы, суд Брэсцкага раёна прызнаў Каўша вінаватым у арганізацыі незаконнага ўезду на тэрыторыю Беларусі, знаходжання на тэрыторыі Беларусі і выезду з Беларусі замежных грамадзян, учыненай групай асоб па папярэдняй змове (на падставе ч. 2 арт. 371–1 КК) і прыгаварыў да чатырох гадоў пазбаўлення волі з адбываннем пакарання ў папраўчай калоніі ва ўмовах узмоцненага рэжыму з канфіскацыяй маёмасці.

Прысуд не набыў законную моц і можа быць абскарджаны.

«У судовым пасяджэнні Коўш сваёй віны не прызнаў», — сказаў Плышэўскі. Ён нагадаў, што 12 сакавіка суд Брэсцкага раёна таксама прызнаў Каўша вінаватым на падставе ч. 2 арт. 371–1 Крымінальнага кодэкса і прыгаварыў да такога ж пакарання. Абвінавачваны абскардзіў прысуд. 30 красавіка судовая калегія па крымінальных справах Брэсцкага абласнога суда, разгледзеўшы касацыйную скаргу і матэрыялы справы, адмяніла прысуд раённага суда.

Крымінальная справа была перададзеная ў суд Брэсцкага раёна на новы разгляд.

• 0
• 0
• 0
• 0
• 0
• 0
• 0
• 0