Дэлегацыя Данецкага гарсавета пераканала прарасійскіх актывістаў, якія захапілі зброю ў будынку Упраўлення СБУ, здаць хоць бы частку арсенала. Пра гэта сёння, 8 красавіка, у ходзе прэс-канферэнцыі паведаміў мэр Данецка Аляксандр Лук'янчанка.
Ён распавёў, што на перамовы з захопнікамі былі дэлегаваныя — сакратар гарадскога савета Сяргей Багачоў, начальнік упраўлення па сувязях з грамадскасцю Максім Равінскі і яшчэ два дэпутаты гарсавета.
Аднак Лук'янчанка не змог адказаць на пытанне журналістаў адносна колькасці здадзенай зброі.
«Людзі, якія бяруць на сябе адказнасць, яны разумеюць, што зброя можа прывесці да кровапраліцця. У выніку яны добраахвотна, самі ініцыявалі сустрэчу з кіраўніцтвам міліцыі і вырашылі пытанне са здачай зброі», — распавёў Максім Равінскі.
Таксама ён паведаміў, што падчас перамоваў з захопнікамі стала ясна, што ў адрозненне ад пратэстоўцаў, іх кіраўнікі могуць фармуляваць сэнс сваіх патрабаванняў. Па словах Равінскага, яны патрабуюць рэферэндум па дэцэнтралізацыі ў выглядзе федэралізацыі і таму падобнае.
«Акрамя абяцання прэм'ер-міністра Арсенія Яцанюка, на сённяшні дзень рэальных дзеянняў, каб людзі зразумелі, як будуць абароненыя іх правы, не зроблена», — падсумаваў начальнік упраўлення.
Цяпер чытаюць
Азараў моцна пакрыўдзіўся на словы «псеўдалідаркі Ціханоўскай», што яго План Перамога быў памылкай31
Каментары