На долю Apple прыпадае 37% беларускага рынку афіцыйнага продажу смартфонаў у сегменце прэміум-класа коштам ад 400 долараў ЗША і вышэй у эквіваленце, паведаміла кіраўнік праектаў Apple Premium Reseller у краінах СНД і Грузіі Надзея Дамарад 23 кастрычніка ў Мінску на прэзентацыі новага прадукту кампаніі — смартфона iPhone 6s. Яго афіцыйны продаж стартаваў у Беларусі апоўдні 23 кастрычніка.
Варта адзначыць, што традыцыйна старт продажу новага iPhone выклікае вялікі ажыятаж, прыхільнікі выстройваюцца ў чэргі, часам нават за некалькі сутак, аднак у Беларусі 23 кастрычніка гэтага заўважана не было. На мясцовым рынку кошт iPhone 6s пачынаецца ад 18 млн рублёў. А, напрыклад, iPhone 6s Plus з памяццю 128 ГБ абыдзецца пакупніку ў 26 млн рублёў.
iPhone 6s стаў прыкметна палепшанай версіяй смартфона iPhone 6, якая атрымала шэраг удасканаленняў. Самае галоўнае з іх — тэхналогія 3D Touch, якая дазваляе ўзаемадзейнічаць з прыладай на новым узроўні. Яна распазнае сілу націскання на экран і адкрывае новыя спосабы доступу да функцый і ўзаемадзеяння з кантэнтам. Апарат атрымаў палепшаную 12-мегапіксельную асноўную камеру з магчымасцю запісу 4K-відэа і найноўшы працэсар А9.
Адной з асноўных эксклюзіўных функцый iPhone 6s і iPhone 6s Plus з'яўляецца тэхналогія Live Photos, якая дазваляе рабіць фотаздымкі, аб'яднаныя ў файл з невялікімі відэаролікамі. Дзякуючы гэтаму пры дакрананні фотаздымак на некалькі секунд нібы ажывае.
Смартфоны даступныя ў чатырох колерах: серабрысты, залаты, «шэры космас» і «ружовае золата». Аб'ём памяці складае 16, 64 і 128 ГБ.
У свеце Apple iPhone 6s і 6s Plus былі афіцыйна прэзентаваныя шырокай публіцы 9 верасня гэтага года. iPhone 6s стаў самым паспяховым смартфонам у свеце, толькі за першы ўікэнд было прададзена 13 млн. асобнікаў.
Каментары