Навукоўцы даказалі сваяцтва сібірскіх народнасцяў з індзейцамі Паўночнай Амерыкі
Расійскія біяінфарматыкі разам з чэшскімі і амерыканскімі калегамі даследавалі геномы чатырох сібірскіх народнасцяў, у мінулым качавых паляўнічых або аленяводаў, і выявілі плынь генаў з Сібіры праз палеаэскімосаў Паўночнай Амерыкі да сучасных індзейцаў на-дэне.
Вынікі даследавання, частка з якіх ужо апублікаваная ў часопісе Scientific Reports, адпавядаюць здагадкам лінгвістаў аб моўнай блізкасці індзейцаў з качэўнікамі з Сібіры.
Штуршком да даследавання паслужыла гіпотэза пра сваяцтва адзінай выжылай мовы з енісейскай сям'і моў — кецкай — з мовай сям'і на-дэне (на ёй размаўляюць індзейцы наваха ў штатах Арызона і Нью-Мексіка).
Правёўшы генетычны аналіз, навукоўцы выявілі сваяцтва чатырох народнасцяў басейна Енісея (кетаў, нганасанаў, селькупаў і энцаў) з палеаэскімосамі, вымерлым народам амерыканскай Арктыкі (блізкасць нганасанаў да палеаэскімосаў была даказаная раней). Пры гэтым кецкая мова не мае нічога агульнага з уральскімі мовамі селькупаў, энцаў і нганасанаў.
«Выкарыстоўваючы новыя метады аналізу поўнагеномных дадзеных, мы паказалі, што палеаэскімосы сапраўды ўнеслі прыкметны ўклад у народы на-дэне, але не ў іншых амерыканскіх індзейцаў. Такім чынам, мы змаглі прасачыць паток генаў з Цэнтральнай Сібіры да народаў на-дэне, датаваны 5-6 тыс. гадоў таму. Гэтыя вынікі яшчэ чакаюць публікацыі», — распавёў адзін з аўтараў даследавання, супрацоўнік вучэбна-навуковага цэнтра ІППІ РАН «Біяінфарматыка» і Універсітэта Остравы (Чэхія) Павел Флягонтаў.
Па словах навукоўца, паток генаў паміж Сібір'ю і на-дэне, натуральна, не даказвае сваяцтва моў кетаў і на-дэне, аднак паказвае, што існавала міграцыя народаў, тэарэтычна здольная перанесці мовы з Сібіры ў Амерыку.
Цяпер чытаюць
Мсціслаў Мекта: яшчэ адзін рэцыдывіст рвецца ва ўладу, прыкінуўшыся спецназаўцам-ябацькам11
Каментары