На 16-м (пазачарговым) з'ездзе Ліберальна-дэмакратычнай партыі 16 ліпеня ў Мінску ад партыі вылучана 110 кандыдатаў у дэпутаты — па адным на кожнай з выбарчых акруг, паведамілі ў прэс-службе ЛДП.
З'езд, прысвечаны вылучэнню кандыдатаў, праходзіў у закрытым для прэсы рэжыме. Як патлумачыў на прэс-канферэнцыі 9 ліпеня першы намеснік старшыні партыі Алег Гайдукевіч, звязана гэта з тым, што з'езд носіць тэхнічны характар з галасаваннем па кожнай кандыдатуры.
На з'ездзе таксама зацверджаны адзіны тэкст выступлення кандыдатаў ад арганізацыі па тэлебачанні і радыё ў перыяд агітацыйнай кампаніі і перадвыбарная праграма «За Моцную Беларусь!».
Згодна з праграмай, ЛДП на парламенцкіх выбарах будзе выступаць за незалежнасць і суверэнітэт краіны, недапушчэнне скажэння ці перапісвання гісторыі ад Полацкага княства да Рэспублікі Беларусь, падтрымку беларускай мовы і культуры, рэгіянальнае развіццё і пашырэнне паўнамоцтваў мясцовых органаў улады.
У знешнепалітычным блоку праграмы падкрэсліваецца, што парламенцкая актыўнасць павінна ўзмацніць ролю краіны на міжнароднай арэне, шматвектарнасць не павінна ісці ў разрэз з нацыянальнымі інтарэсамі. «ЛДПБ упэўнена заяўляе, што лепшай формулы выбудоўвання міжнароднай палітыкі, чым: Захад — наш Партнёр, а Расія —парламенцкі Саюзнік, пакуль няма і ў агляднай будучыні не прадбачыцца», — адзначаецца ў праграме.
Партыя таксама выступае за стварэнне «магутнага інфармацыйна-прапагандысцкага рэсурсу, які павінен на ўсіх папулярных замежных мовах даносіць сусветнай грамадскасці пазіцыю нашай краіны, лабіраваць нашы інтарэсы і ствараць пазітыўны вобраз, дапамагаючы замежнікам пераадолець навязаныя стэрэатыпы».
Цяпер чытаюць
Жалезная заслона ў дзеянні: як зменшылася колькасць перасячэнняў мяжы Беларусі і Еўрасаюза за апошнія гады3
Каментары