Акруговая выбарчая камісія Старавіленскай акругі № 105 вынесла 5 верасня папярэджанне кандыдату ў дэпутаты ад Партыі БНФ Уладзіміру Падголу.
«Старшыня камісіі на пасяджэнні сказаў, што я правёў несанкцыянаваны пікет, — паведаміў Падгол. — У сваім адказе я сказаў, што ён не ведае закон, бо для правядзення пікетаў кандыдата ў дэпутаты не патрэбная санкцыя, яны праводзяцца згодна з паведамляльным прынцыпам».
Пры гэтым, адзначыў ён, у камісіі нават не было копіі заявы, якую Падгол занёс у Мінгарвыканкам і якой паведамляў аб правядзенні пікетаў. Як растлумачыў кандыдат, у паведамленні ён назваў у тым ліку і вуліцу Няміга, на якой 31 жніўня на пікеце адзначыў дзень нараджэння кіраўніка дзяржавы і яго малодшага сына, сумясціўшы са святкаваннем дня нараджэння сваіх катоў. Аднак у камісіі сцвярджалі, што ён павінен быў напісаць канкрэтны дом і час пікетавання.
Паводле слоў Падгола, яму было таксама інкрымінаванае распаўсюджванне без выхадных звестак цытатніка Лукашэнкі, які ён сам раздрукаваў яшчэ год таму, а таксама палос паперы з цытатамі кіраўніка дзяржавы.
Акрамя таго, Падголу ставілі ў віну выкарыстанне незарэгістраванай сімволікі — сцягоў ЗША і ЕС, а таксама бел-чырвона-белага сцяга. «Усе гэтыя сцягі ў іх класіфікацыі з'яўляюцца незарэгістраванай сімволікай, якой я не маю права карыстацца», — сказаў ён.
Гэта першае папярэджанне Падголу. У выпадку атрымання другога кандыдат у дэпутаты можа быць зняты з выбараў.
Каментары