У Беларусі завяршаецца праца па стварэнні якасных аўтатрас, якія звязваюць кожны абласны цэнтр з Мінскам, заявіў 21 кастрычніка прэм'ер-міністр Андрэй Кабякоў падчас азнаямлення з ходам работ па рэканструкцыі аўтадарогі М6 Мінск — Гродна.
«Рэканструкцыя М6 — апошні крок да рэалізацыі ідэі аб тым, што кожны абласны цэнтр павінен быць звязаны з Мінскам дарогамі адпаведнага класа. Рух па магістралі інтэнсіўны, праект па яе рэканструкцыі нам вельмі важны. Мяркуецца, што ён павінен быць завершаны ў поўным аб'ёме ў канцы 2018 года», — цытуе прэм'ер-міністра прэс-служба ўрада.
У ліку наступных актуальных праектаў — рэканструкцыя аўтадарогі М10 паміж Брэстам і Гомелем. «Праект будзе рэалізоўвацца на прынцыпах дзяржаўна-прыватнага партнёрства з Еўрапейскім банкам рэканструкцыі і развіцця. Разлічваем, што ён запрацуе ў найбліжэйшы час», — адзначыў Кабякоў.
Прэм'ер-міністру таксама прадставілі перспектывы будаўніцтва ўчастка аб'язной дарогі ў Гродне з рэканструкцыяй моста, які будзе гатовы ў пачатку 2017 года.
Участак дарогі плануецца пабудаваць за сродкі кітайскай крэдытнай лініі. Праект ужо распрацоўваецца. Акрамя будаўніцтва дарогі ён прадугледжвае рэканструкцыю 300-метровага чыгуначнага моста пад аўтадарожны. Гэты ўчастак дазволіць знізіць аўтамабільную нагрузку на Румлёўскі мост і частку горада, па якіх кожныя суткі едуць сотні вялікагрузаў з боку мяжы. Дарога звяжа аб'язным шляхам два супрацьлеглыя мікрараёны горада. Пазней плануецца злучыць яе з дарогай, якая вядзе ў Літву. Такім чынам будуць забяспечаны зручныя зносіны М6 з выездам не толькі на польскую, але і на літоўскую мяжу.
Кіраўніку ўрада таксама далажылі аб планах па спалучэнні аўтатрас з польскім і літоўскім бокам, каб міжнародныя транспартныя калідоры працягваліся адпаведным класам дарог па розныя бакі межаў. «Разуменне ёсць, думаю, што ў найбліжэйшыя тры-чатыры гады нашы грамадзяне ў поўнай меры адчуюць камфорт ад гэтай працы», — падкрэсліў Андрэй Кабякоў.
Ацаніўшы ход рэканструкцыі аўтадарогі М6, якая вядзецца за сродкі Сусветнага банка, ён адзначыў эфектыўнае супрацоўніцтва Беларусі з банкам. «Гэта выгаднае для нас супрацоўніцтва вядзецца не адно дзесяцігоддзе. Важна, што, паступова вяртаючы крэдыт, мы значна раней атрымліваем магчымасць карыстацца вынікамі праектаў», — дадаў прэм'ер-міністр.
Да 2018 года трэба будзе рэканструяваць ўчасткі аўтадарогі М6 з 57,3 км па 130,4 км і з 197,7 км па 211 км. Штодня на аб'екце працуюць каля 400 чалавек і 330 адзінак тэхнікі. 14—23 верасня адбыўся візіт групы спецыялістаў Сусветнага банка, якая засталася задаволеная ходам выканання работ на пачатковых этапах.
Цяпер чытаюць
«Дзед будзе глядзець асабіста. Калі яму спадабаецца…» Зянковіч расказаў, як з ім запісвалі першае інтэрв'ю ў СІЗА КДБ1
Каментары