Замест адной, у Варшаве створаць чатыры беларускія школьныя групы
У наступным навучальным годзе ў Варшаве можа зьявіцца чатыры беларускія міжшкольныя і дашкольныя групы. Паводле польскіх законаў, для таго, каб адчыніць міжшкольную групу, патрэбна мінімум трое дзяцей.
Ахвотных ужо значна больш, чым было ў лютым, калі бацькі ўпершыню агучылі гэтую ідэю, распавядае прысяжная і сінхронная перакладчыца з Варшавы Марыя Луцэвіч-Напалкава, мама дзьвюх будучых навучэнак міжшкольнай і школьнай групаў.
«Мы стартавалі зь мінімальнымі плянамі, каб проста адчыніцца, але атрымалася, што жадаючых нашмат больш. Магчыма, што будзе дзьве групы для малодшых дзяцей, і дзьве для школьнікаў. Нашая акцыя выклікала досыць вялікую зацікаўленасьць. Мы спадзяемся, што яна будзе пашырацца».
Заявы ў дашкольную групу можна падаваць да канца чэрвеня. Ініцыятары кампаніі просяць усіх зацікаўленых пісаць на адрас [email protected] і абяцаюць, што дапамогуць з далейшымі фармальнасьцямі. Заявы бацькоў разглядае мэрыя Варшавы.
«І прадстаўнікі Міністэрства, і варшаўская мэрыя, падтрымліваюць нашую ініцыятыву. Раней адчыніць міжшкольныя групы ў Варшаве атрымалася толькі ва ўкраінцаў, немцаў і армянаў. Мы спадзяемся, што з новага навучальнага году пачнуцца заняткі зь дзеткамі» — гаворыць Марыя Луцэвіч-Напалкава.
У дадзены момант ідзе пошук настаўнікаў і выхавацеляў у беларускія групы. Бацькі заклікаюць зацікаўленых асобаў кантакавацца і дасылаць свае прапановы на згаданы вышэй мэйл.
«Групы павінны будуць працаваць па прынцыпе дадатковых заняткаў пасьля асноўных урокаў у школах і заняткаў у садках. Форму мы яшчэ будзем абмяркоўваць разам. Магчыма, гэта будуць буднія дні, а магчыма і выходныя. Думаю, што пачнем ад заняткаў раз на тыдзень. Па законе, там можа быць і гісторыя, геаграфія і культура Беларусі. Мы зь нецярпеньнем чакаем фіналу. І будзем ад малога ісьці сур’ёзнымі крокамі наперад».
Каб далучыцца да беларускіх групаў у Варшаве, альбо стварыць уласную ў любым іншым горадзе Польшчы, дастаткова выканаць дзьве фармальнасьці. Трэба каб дзіця было грамадзянінам Польшчы, а бацькі павінны накіраваць пісьмовую заяву ў школу або садок, дзе вучацца іх дзеці. Паводле польскіх законаў, для таго, каб адчыніць міжшкольную ці дашкольну групу, патрэбна мінімум трое дзяцей.
Цяпер чытаюць
Мсціслаў Мекта: яшчэ адзін рэцыдывіст рвецца ва ўладу, прыкінуўшыся спецназаўцам-ябацькам20
Каментары