Статкевіч пра паплечніка Кунцэвіча: «Ён не завербаваны спецслужбамі, гэта праблемы са здароўем»
Апошнія суткі ў фэйсбуку адзначыліся дзіўнай актыўнасцю былога палітвязня Сяргея Кунцэвіча, які пару тыдняў таму выйшаў на волю. Кунцэвіч быў арыштаваны напярэдадні Дня Волі, яго машыну, з поўным багажнікам кактэйляў Молатава, паказвалі па дзяржаўным тэлебачанні. Хлопец праходзіў па «Справе Белага легіёна».
Кунцэвіч быў тым, хто змог з турмы паведаміць пра катаванні, якія супраць яго ўжываліся ў зняволенні. У хуткім часе ён апынуўся на волі.
Цяпер Кунцэвіч пераўтварыўся ў бязлітаснага крытыка свайго колішняга паплечніка і лідара Мікалая Статкевіча. Ён зняў відэа, якое называецца «Аб кульце асобы Мікалая Статкевіча». Мы не будзем яго перадрукоўваць тут, абмяжуемся некалькімі пунктамі з гэтай прамовы.
1. Не падтрымліваць акцыю Статкевіча на 3 Ліпеня, не прыходзіць на яе, бо Статкевіч хоча сутыкнуць людзей ілбамі 2. Лукашэнка не хоча дзяліцца ўладай з другім Лукашэнкам, гэта значыць са Статкевічам 3. Статкевіч навучыў Кунцэвіча хлусіць на камеру 4. Статкевіч піярыцца на затрыманнях сваіх актывістаў.
Кунцэвіч чытаў свой зварот з паперкі, ён быў загадзя напісаны. Некаторыя праз гэта меркавалі, што Кунцэвіч мог быць завербаваны. Таксама шмат крытыкі ад былога палітвязня дастаецца рэдактарцы сайта «Хартыя-97» Наталлі Радзінай.
Мы спыталі ў Мікалая Статкевіч, з чым звязаныя рознагалоссі паміж ім і былым (?) паплечнікам.
«Сяргей — для мяне герой. Сваім прызнаннем пра катаванні ён зрабіў вельмі шмат і для сябе, і для іншых людзей, што цяпер знаходзяцца за кратамі. Цяпер катаванні спыніліся. А сляды катаванняў на целе Сяргея былі зафіксаваныя праваабаронцамі
З Кунцэвічам у турме абыходзіліся не па-людску. Ён тры дні трымаў галадоўку, маючы хворыя ныркі. Па вызваленні з турмы арганізм яшчэ трое сутак мабілізаваны, а пасля расслабляецца.
Разумееце, псіхіка маладога непадрыхтаванага чалавека была пад ударам у зняволенні, ён атрымаў псіхалагічную траўму.
Я не зважаю на тыя словы, якія сёння гучаць з боку Сяргея. Наадварот, мяне вельмі хвалюе яго стан здароўя, шукаем надзейных прафесійных дактароў, якія могуць яму дапамагчы.
Гэта не вярбоўка, а менавіта стан здароўя. Тое, што ён зрабіў, які ўдар нанёс спецслужбам інфармацыяй пра катаванні, ніякая вярбоўка не можа кампенсаваць. Бо гэта быў пракол і правал КДБ», — мяркуе Мікалай Статкевіч.
Чытайце таксама:
Статкевіч: Майго паплечніка катавалі электрашокерам у КДБ, каб даведацца маё месцазнаходжанне перад 25 сакавіка
Павел Вінаградаў упершыню расказвае, як яго закінулі на самае дно беларускай турмы. Як гэта — калі суседзі за цыгарэту ядуць чужое гаўно18
Каментары