Xiaomi прадставіла маленькі камп'ютар з галасавым памочнікам для дзяцей
Xiaomi на сваёй краўдфандынгавай пляцоўцы прадставіла прыладу Xiaoxun Children Computer — дзіцячы камп'ютар з функцыяй галасавога памочніка, піша igeekphone.com.
Паводле апісання прылады, у яе базе знаходзіцца больш за тры мільёны гісторый і казак, якія віртуальны асістэнт можа чытаць перад сном, 50 000 дыялогаў з рознымі персанажамі, а таксама больш за дзве тысячы навучальных практыкаванняў.
Да камп'ютара можна падключыць мікрафон для баўлення часу з караоке.
Бацькоўскі кантроль дазваляе абмяжоўваць час працы камп'ютара. Ён абсталяваны 7-цалевым IPS-дысплэем з разрозненнем 1024 на 600 пунктаў, 4-ядзерным працэсарам з тактавай частатой у 1,2 ГГц, камерай з падтрымкай запісу Full HD-відэа і акумулятарам на 4000 мАг. Працуе пад кіраваннем АС Android 6.0 Marshmallow. Інтэрфейс зроблены максімальна простым і зразумелым для дзіцяці.
У Кітаі апарат па перадзамове даступны за 111 даляраў. Можна меркаваць, што ў Беларусі ён з'явіцца няскора, бо падтрымлівае пакуль толькі ангельскую ды кітайскую мовы.
Каментары