Вярхоўны суд пастанавіў вярнуць жыхару Віцебска бел-чырвона-белы сцяг, адабраны на Дзень Волі
Андрусь Кешанюк дайшоў да Вярхоўнага суду, каб аспрэчыць адміністрацыйнае спагнаньне за аднаасобную несанкцыянаваную акцыю. Таксама ён напісаў заяву, каб вярнулі ягоную маёмасьць, піша Радыё Свабода.
Вярхоўны суд не адмяніў накладзеных штрафаў, але пастанавіў адмяніць канфіскацыю «рэчавых доказаў».
Сьцяг быў канфіскаваны паводле рашэньня Першамайскага райсуду Віцебску, які абвінаваціў Кешанюка за віншаваньні калег, супрацоўнікаў віцебскага «Белтэлекаму», са стагадовым юбілеем Беларускай Народнай Рэспублікі. Падчас суду міліцыянты Васіль Кароткі і Расьціслаў Чэкан заявілі, што затрыманы «чапляўся нагамі за зямлю» — у гэтым і праявілася ягонае непадпарадкаваньне.
Кешанюк не адмаўляў, што разгарнуў сьцяг каля будынка «Белтэлекаму», але сьведчаньні амапаўцаў аб непадпарадкаваньні назваў хлусьнёй. Судзьдзя Натальля Карабліна аштрафавала яго за незаконнае пікетаваньне і за непадпарадкаваньне супрацоўнікам міліцыі на 10 базавых велічынь (245 рублёў). Суд пастанавіў таксама сканфіскаваць «атрыбут пікетаваньня» — бел-чырвона-белы сьцяг.
Гэтую пастанову Андрусь Кешанюк спрабаваў аспрэчыць праз абласны суд, але безвынікова. Вярхоўны суд вырашыў зьмяніць вырак актывісту, але не цалкам: штрафы прызналі законнымі, а канфіскацыю — не.
Старшыня Вярхоўнага суду Валянцін Сукала разгледзеў у парадку нагляду адміністрацыйную справу Андруся Кешанюка і пастанавіў выключыць з пастановаў згадку пра канфіскацыю рэчавых доказаў. Бо гэта не прадугледжана ніводным з артыкулаў, паводле якіх актывіста пакаралі.
Цяпер чытаюць
Дырэктарка эталоннага калгаса ў Добрушы 12 гадоў хавала падзеж і збівала падначаленых. Аднаго спрабавала накарміць сіласам18
Каментары