Тэлевядучая Вольга Аверкава-Літвінава стала мамай другі раз. Нараджаць дачка прапагандыста АНТ Аляксандра Аверкава ездзіла ў Літву.
Яна расказала «Нашай Ніве», што абрала дзяржаўную лякарню Вільнюскага ўніверсітэта Сантарышкес. Там жа два гады таму яна нараджала дачку.
«Адразу хачу сказаць, што я не пашкадавала ні на хвіліну пра тое, што вырашыла явіць немаўля свету ў гэтым горадзе. Наступным разам прайду гэтай жа сцежкай»,
— пісала тады ў сацыяльных сетках вядучая.
Тады ж яна тлумачыла, чаму выбрала дзяржаўную літоўскую лякарню, а не прыватную:
«Па-першае, гэта нашмат танней. У прыватнай уся цуда-падзея можа абысціся ў 5-7 тысяч еўра з усімі аналізамі. У дзяржаўнай — каля 1,5 тысячы. Па-другое, у Сантарышкес працуюць дактары са штата прыватнай радзільні. Па-трэцяе, пры ўніверсітэцкай лякарні ёсць дзіцячая рэанімацыя. У выпадку непрадбачаных ускладненняў дзіця і маму вязуць з прыватнай клінікі на хуткай менавіта ў Сантарышкес. Клініка ціхая, спакойная, корпус новы, у аглядных пакоях усё вельмі прыгожа і сучасна».
«Я любыя грошы аддала б толькі за адно стаўленне»,
— хваліла літоўскую лякарню Аверкава-Літвінава.
Чаму не віп-палата беларускай радзільні, напрыклад? Вольга тлумачыць, што яны з мужам жывуць на два гарады — Мінск і Вільня.
«Нам зручней было тут на гэтыя даты», — адказвае вядучая.
Яе бацька Аляксандр Аверкаў 18 гадоў працуе на тэлеканале АНТ, дзе расказвае ў тым ліку і пра цудоўную айчынную медыцыну. Раней ён вёў штотыднёвую праграму «Контуры», цяпер — «Нашы навіны». Быў ўзнагароджаны медалём Францыска Скарыны, а з 50-гадовым юбілеем Аверкава віншаваў асабіста Аляксандр Лукашэнка.
Вольга, як і бацька, будуе сваю кар’еру на тэлебачанні. Яна вядзе прагноз надвор’я на тэлеканале ВТВ.
Каментары