ЕС не прызнае вынікі прэзідэнцкіх выбараў у Беларусі, падтрымлівае мірных дэманстрантаў
Кіраўнікі дзяржаў і ўрадаў краін ЕС не прызнаюць вынікаў выбараў прэзідэнта Беларусі. Пра гэта ў сераду, 19 жніўня, заявіла канцлер Нямеччыны Ангела Меркель па выніках надзвычайнага саміту ў Брусэлі, піша Deutsche Welle.
Паводле яе слоў, галасаванне не было ні справядлівым, ні свабодным.
«Выбары не былі ні справядлівымі, ні свабоднымі, і па гэтай прычыне вынік гэтых выбараў не можа быць прызнаны», — заявіла кіраўнік кабміна Нямеччыны, якая з 1 ліпеня па ратацыі з'яўляецца старшынёй Рады ЕС.
Няма ніякіх сумненняў у тым, што мелі месца масавыя парушэнні, адзначыла Меркель па выніках кансультацый, якія доўжыліся каля трох гадзін.
«Мы асуджаем жорсткі гвалт супраць людзей», — дадала яна. Усе палітвязні павінны быць безумоўна вызваленыя, падкрэсліла канцлер.
Меркель таксама заявіла пра падтрымку мірных дэманстрантаў.
Акрамя таго, неабходны нацыянальны дыялог, на якім настойвае апазіцыя, упэўнена кіраўнік кабміна Нямеччыны.
Каментары