Два месяцы таму была параненая Наталля Лубнеўская. Крымінальнай справы няма, праводзіцца бясконцая «праверка»
Увечары 10 жніўня на вуліцы Кальварыйскай у Мінску была параненая журналістка «Нашай Нівы» Наталля Лубнеўская. Баец спецпадраздзялення «Альфа» ці «Алмаз» наўмысна стрэліў у яе гумавай куляй з адлегласці каля 10 метраў.
Прайшло два месяцы — і Следчы камітэт усё яшчэ не завёў крымінальную справу. «Праводзіцца праверка», — адказваюць «Нашай Ніве» ў прэс-службе СК.
Наталля правяла паўтара месяца ў бальніцы, цяпер знаходзіцца на амбулаторным лячэнні і не можа вярнуцца да паўнавартаснай працы — а імітацыя «праверкі» ўсё яшчэ працягваецца.
Яшчэ месяц таму следчыя хваліліся, што нібыта ўзялі патрэбныя запісы з камер відэаназірання, што нібыта апытваюць сведкаў — але ніхто нават не прасіў кантакты журналістаў, якія знаходзіліся побач з Наталляй у момант стрэлу.
Следчы камітэт дэманструе поўную адсутнасць палітычнай волі для пошуку злачынцы. Баец, які страляе па мірных грамадзянах, мусіць панесці адказнасць у адпаведнасці з заканадаўствам:
- Перавышэнне ўлады ці службовых паўнамоцтваў, спалучанае з ужываннем зброі, караецца зняволеннем на тэрмін да 10 гадоў.
- Наўмыснае нанясенне менш цяжкага цялеснага пашкоджання (якое не ўяўляе небяспеку для жыцця, але выклікала працяглае расстройства здароўя на тэрмін да чатырох месяцаў), здзейсненае агульнанебяспечным спосабам караецца зняволеннем на тэрмін да 5 гадоў.
- Перашкода законнай прафесійнай дзейнасці журналіста караецца зняволеннем на тэрмін да 3 гадоў.
Увага! У канцы відэа дэманструецца адкрытая рана.
Цяпер чытаюць
Навуковец распавёў пра геалагічныя загадкі Беларусі: іртуць з зямлі і кратар ад падзення метэарыта, які знішчыў усё жывое ў радыусе тысяч кіламетраў44
Каментары