1 чэрвеня выйдзе дэбютны альбом пераможцы Еўрабачання-2009.
1 чэрвеня выйдзе дэбютны альбом пераможцы песеннага конкурсу «Еўрабачанне‑2009» Аляксандра Рыбака Fairytales («Казкі»).
Пра гэта нарвежскі спявак і музыкант расказаў 29 мая падчас анлайн‑канферэнцыі на тэлеканале ОНТ у Мінску.
Найбліжэйшым часам у Рыбака запланаваны гастролі па Нарвегіі, але са сваімі танцорамі і гуртам яны з задавальненнем прыедуць і ў Беларусь, заявіў ён.
У Мінск выканаўца прыехаў з маці на адзін дзень паводле запрашэння АНТ у якасці члена журы паўфіналу конкурсу «Новыя галасы Беларусі».Гэта яго першы візіт на радзіму за амаль 18 гадоў пасля ад’езду з сям’ёй у Нарвегію. Таму, паведаміў Рыбак, ён таксама прыехаў у Мінск, каб «са сваякамі пагаварыць, пазнаёміцца з людзьмі, якія яго падтрымлівалі і падтрымліваюць». «Тут усе вельмі‑вельмі мілыя і прыемныя», — сказаў ён.
Мінск, дзе Рыбак нарадзіўся ў 1986 годзе, ён зусім не памятае, але, паводле яго слоў, «нядрэнна памятае» вёскі ў Мінскай і Віцебскай абласцях, дзе жывуць яго бабулі.
Па‑беларуску Рыбак ведае некалькі слоў, з бацькамі ў сям’і размаўляе па‑расейску з нарвежскімі словамі. А яго любімая страва — беларускія калдуны.
«Музыка — гэта натхненне», — заявіў Рыбак. Для рознага віду дзейнасці, паводле яго слоў, ён выбірае розную музыку, каб яна дапамагала яму. Удзел у «Еўрабачанні‑2009», зазначыў спявак, стаў самым адважным учынкам у яго жыцці. Ён лічыць, што яго ўзрост пакуль дазваляе яму «дурэць на сцэне». Рыбак не выключае, што стане кампазітарам і напіша мюзікл. «У 50 гадоў не жадаю быць teenage idol — кумірам для падлеткаў», — сказаў ён.
Адказваючы на пытанне БелаПАН, пра што спявак спытаўся б у беларускага прэзідэнта, калі б з’явілася такая магчымасць, Рыбак адказаў: «Спытаў бы, як яму тут, у Беларусі?»
Каментары