Беларуская каманда заняла 2‑е месца ў медальным заліку на чэмпіянаце свету па веславанні на байдарках і каноэ.
Беларускія весляры заваявалі 7 залатых мадалёў.
Столькі ж у актыве зборнай Германіі, якая, акрамя таго, атрымала яшчэ 8 сярэбраных і 3 бронзавыя ўзнагароды. У дзесятку лепшых увайшлі таксама спартсмены Венгрыі — 5 залатых, 4 сярэбраныя і 2 бронзавыя медалі, Іспаніі (2, 1, 1), Расіі (1, 5, 3), Францыі (1, 2, 5), Італіі (1, 1, 1), Азербайджана (1, 1, 1), Польшчы (1, 1, 0) і Канады (1, 0, 3). Усяго медалістамі станавіліся атлеты 22 краін.
У балавым заліку беларуская дружына заняла 9‑е месца сярод 63 краін (319 балаў). Наперадзе зборныя Венгрыі — 684, Германіі — 681 і Канады — 593.
У алімпійскіх дысцыплінах беларусы на 12‑й пазіцыі (135 ачкоў). У лідэрах тут Германія (323), Венгрыя (293) і Іспанія (252). У неалімпійскіх дысцыплінах Беларусь на 8‑м месцы (184 ачкі). Наперадзе Венгрыя (391), Германія (358) і Канада (349).
Аднак па эфектыўнасці беларуская каманда стала ледзь не лепшай на сусветным першынстве, бо па колькасці спартсменаў яна прыметна ўступала многім зборным, да таго ж была прадстаўлена пераважна толькі ў мужчынскіх спаборніцтвах.
Нагадаем імёны беларускіх трыумфатараў чэмпіянату свету:
байдарка‑чацвёрка на алімпійскай дыстацыі 1000 м (Раман Петрушэнка, Вадзім Махнёў, Аляксей Абалмасаў і Артур Літвінчук);
неалімпійская каноэ‑чацвёрка на дыстанцыі 1000 м (Дзяніс Гаража, Дзмітрый Рабчанка, Дзмітрый Вайцішкін і Аляксандр Валчэцкі);
байдарка‑двойка Рамана Петрушэнкі і Вадзіма Махнёва на алімпійскай дыстанцыі 500 м і на неалімпійскай 200 м;
Дзяніс Гаража ў спаборніцтвах каноэ‑адзіночак на алімпійскай дыстанцыі 500 м;
каноэ‑чацвёрка ў складзе Андрэя і Аляксандра Багдановічаў, Дзмітрыя Рабчанкі і Аляксандра Валчэцкага на неалімпійскай дыстанцыі 200 м;
байдарка‑чацвёрка (Раман Петрушэнка, Вадзім Махнёў, Аляксей Абалмасаў і Артур Літвінчук) на неалімпійскай дыстанцыі 200 м.
Каментары