Падчас адпачынку ў Рэчыцкім раёне ў сваёй бабулі.
Сустаршыня аргкамітэту Беларускай Хрысціянскай Дэмакратыі Павал Севярынец да канца лета знаходзіцца ў творчым адпачынку на вёсцы Унорыца Рэчыцкага раёну Гомельскай вобласці.
Тут ён працуе над сваёй новай кнігай, а раз‑пораз з задавальненнем ходзіць у грыбы ў найбліжэйшы лес на беразе Дняпра. Падчас апошняга візіту па баравікі ды лісічкі палітыка чакала дзіўная сустрэча.
— Убачыў дзіўную істоту — нешта скача, нібыта гуляе ў шахматы. Аказалася, гэта заяц, які даў сябе злавіць, а яго паводзіны прымусілі мяне занесці жывёліну ў вёску,— распавёў Павал Севярынец.
— На зайца прыйшло паглядзець паўвёскі. А скакаў ён так дзіўна, бо, аказалася,
гэта цяжарная зайчыха, якая мае хворыя вочкі.
На сямейнай нарадзе вырашылі пакінуць зайчыху на аздараўленне ў вёсцы.
— Улічваючы абставіны сустрэчы, якія нагадалі мне падзеі сусветна вядомай кнігі Льюіса Кэрала, я назваў яе Алісай. Кансультацыі з ветэрынарам адбываюцца праз мабільны тэлефон — яму выслалі здымкі хворых вачэй жывёлы.
Новая кватэра Алісы — іржавая тэлефонная будка, якая стаіць у двары бабулі Севярынца. У Алісы добры апетыт, яна амаль не пужаецца людзей.
— Зайчыха добра корміцца з вясковага гародчыка. Таму, спадзяюся, тут яна набярэ сілы ды падлечыцца. Вось так у мяне з’явіўся свой чароўны трусік, — жартуе Севярынец.
Цяпер чытаюць
Паветраная гімнастка паказала закуліссе працы ў Белдзяржцырку5
Каментары