Па БТ выйшаў сюжэт пра «дрон са смяротным грузам», які ляцеў у Беларусь з Украіны
8 чэрвеня па БТ расказалі пра «дрон са смяротным грузам», які нібыта ляцеў у Беларусь з Украіны. Сцвярджаецца, што ён мусіў атакаваць пазіцыі беларускіх вайскоўцаў (па прыкладзе падобных атак на расійскіх вайскоўцаў у Белгарадскай вобласці), але на мяжы яго «нейтралізавалі» падраздзяленні радыёэлектроннай барацьбы.
«Дыверсійны дрон» нібыта ўпаў у бязлюднай мясцовасці, а боепрыпасы «ад аўтаматычнага гранатамёта» не ўзарваліся.
Аўтары заяўляюць, што дрон быў узброены боепрыпасамі ад аўтаматычнага гранатамёта АГС-17 і яму трэба 3 хвіліны, каб «скінуць зарады у размяшчэнне беларускіх войскаў».
Высвятляецца, што гэтае здарэнне на беларуска-ўкраінскай мяжы адбылося яшчэ 30 мая, але паведамілі пра яго чамусьці толькі цяпер.
Прапагандысты заяўляюць, што «Украіна хацела атакаваць Беларусь з дапамогай дрона», што мэтай было «ўцягванне нашай краіны ў баявыя дзеянні».
У сюжэце паказваецца беспілотнік, на якім не відаць грузу, а таксама прадмет, які ляжыць у траве і нагадвае боепрыпас ад АГС-17, і фота, як сцвярджаецца, зробленыя з дрона. Ёсць нібыта таксама кадры з іншых вылетаў, а таксама здымак «дыверсійнай групы», якая ажыццявіла запуск.
Раней гісторыя з украінскім беспілотнікам у выкананні лукашэнкаўскіх прапагандыстаў ужо была, падобны сюжэт выходзіў зімой 2022-га, яшчэ да пачатку расійскай агрэсіі. Тады многія спецыялісты выказвалі сумневы адносна таго, што факты, выкладзеныя ў сюжэце, сапраўды мелі месца.
Цяпер чытаюць
Анатоль Котаў ужо выязджаў у Турцыю і лічыў яе бяспечнай — крыніцы8
Каментары