Падазраваны ў забойстве Сіндза Абэ гаворыць, што зрабіў гэта не з-за палітыкі
Падазраваным у забойстве былога прэм'ер-міністра Японіі Сіндза Абэ з'яўляецца 41-гадовы Тэцуя Ямагамі, паведамляе Guardian са спасылкай на паліцыю. Ямагамі жыхар горада Нара і ў 2000-х правёў тры гады ў марскіх сілах самаабароны. Паводле інфармацыі паліцыі, мужчына прызнаўся, што планаваў забойства Абэ «з-за таго, што быў незадаволены ім з-за не звязаных з палітыкай пытанняў».
Ямагамі паведаміў, што меў крыўду на «канкрэтную арганізацыю» і лічыў, што Абэ быў яе часткай. Зрэшты, пакуль невядома, ці існавала гэтая неназваная арганізацыя на самай справе.
У паліцыі паведамляюць, што Ямагамі, верагодна, учыніў забойства з самаробнай стрэльбы. На відэа з месца трагедыі відаць, што зброя складаецца з двух цыліндрычных металічных частак, трывала змацаваных чорнай стужкай.
Падчас ператрусу дома ў падазраванага канфіскавана некалькі самаробных адзінак зброі, падобнай да той, з якой быў здзейснены напад. Зараз праваахоўнікі правяраюць, дзейнічаў Тэцуя Ямагамі самастойна ці меў саўдзельнікаў.
Як паведамлялася, сёння ў выніку цяжкага агнястрэльнага ранення былы прэм'ер-міністр Японіі Сіндза Абэ памёр у бальніцы.
Тым часам японскія СМІ апублікавалі яшчэ адно відэа з момантам стрэлаў у Сіндза Абэ. На кадрах добра відаць, як першы стрэл не дасягнуў мэты, а забойца толькі з другога разу змог цяжка параніць былога прэм'ера Японіі.
Чытайце таксама:
Як палітычная кар'ера залежыць ад запалення кішэчніку. Незвычайная доля Сіндза Абэ, якога сёння забілі
Мільянер Варабей атрымаў права на забудову цэнтра Мінска — узамен за дарагую клініку для Лукашэнкі7
Каментары