ГУР: Нагнятанне тэмы пагрозы нападу з боку Беларусі — расійская інфармацыйная спецаперацыя. Нават Лукашэнка не вельмі ў гэта гуляе
У Галоўным упраўленні разведкі лічаць, што нагнятанне тэмы пагрозы нападу на Украіну з боку Беларусі з'яўляецца расійскай інфармацыйна-псіхалагічнай аперацыяй. Словы прадстаўніка Галоўнага ўпраўлення разведкі Мінабароны Андрэя Юсава ў эфіры тэлемарафону перадае «УП».
«Канцэптуальнае нагнятанне тэмы неадкладнай вайсковай пагрозы з боку Беларусі, як інфармавала ўжо Галоўнае ўпраўленне разведкі, гэта, уласна, расійскае ІПСА. Безумоўна, пра дыктатара Лукашэнку нам усё вядома, пра рэжым у Беларусі. Але ёсць аб'ектыўныя рэчы: колькасць ударнай групоўкі, гатоўнасць сіл і сродкаў і іншыя моманты, якія нам дазваляюць сцвярджаць, што на сёння пагрозы з боку Беларусі поўнамаштабнай наземнай аперацыі, яе ўдзелу на баку Расіі няма», — сказаў Юсаў.
Ён паабяцаў, што, «калі сітуацыя зменіцца, адпаведная інфармацыя будзе», але запэўніў, што «нават на выпадак змены сітуацыі Украіна гатовая і адпрацавала ўсе сцэнары».
«У інтарэсах менавіта Пуціна і так званай Расійскай Федэрацыі максімальна нагнятаць тэму менавіта з Беларуссю. Але ўжо і дыктатар Лукашэнка не вельмі ў гэта гуляе. Мы нядаўна бачылі, як ён вадзіў за нос Лаўрова падчас сустрэчы, і, з аднаго боку, расказваў, як ён любіць Пуціна, а потым сказаў, што не бачыць пагрозы з боку Украіны, і што Украіна трымаецца. Гэта значыць, не хоча рабіць суіцыдальных дзеянняў дыктатар Лукашэнка», — сказаў прадстаўнік ГУР.
Ён таксама зазначыў, што контрнаступальная аперацыя па вызваленні сваіх зямель для Украіны «сапраўды цяжкая», але Украіна можа вызваліць свае землі.
«Украіна вызваляе і будзе працягваць вызваляць свае тэрыторыі. Так, гэта будзе цяжка, але непазбежна… Паверце, што ёсць абсалютная адэкватная і цвярозая ацэнка сітуацыі і адэкватныя і цвярозыя задачы і для ўкраінскіх сіл абароны, і разуменне, што мы можам. Дык вось мы сапраўды можам вызваліць нашы землі».
19 студзеня Аляксандр Лукашэнка на сустрэчы з міністрам МЗС РФ Лаўровым заявіў, што Украіна яго «прыемна здзіўляе», бо не ідзе на правакацыі супраць Беларусі, хаця «яе актыўна падштурхоўваюць».
Цяпер чытаюць
Пасадзілі падпалкоўніка і былога выкладчыка Вайсковай акадэміі. Ён падтрымаў народ у 2020-м10
Каментары