«Запаскудзілі прыбіральні і дамы, скралі рэчы». У Белгародскай вобласці паскардзіліся на паводзіны расійскіх вайскоўцаў
Расійскія вайскоўцы ў вёсцы Новая Тавалжанка «вядуць пячорны лад жыцця» і «крадуць асабістыя рэчы і маёмасць» з дамоў мясцовых жыхароў. На паводзіны вайскоўцаў паскардзілася ў каментары на старонцы кіраўніка Белгародскай вобласці «УКантакце» жыхарка Шабекіна Наталля Чамерчанка, як піша meduza.
«Новая Тавалжанка, вуліца Валчанская. У многія дамы пранікаюць вайскоўцы РФ (хоць рэжыму надзвычайнага становішча не ўвялі, і яны не маюць права заходзіць у прыватныя домаўладанні). Яны жывуць у нашых дамах, вядуць пячорны лад жыцця, алкаголь і іншае застаецца ў выглядзе смецця і бруду, запаскуджваюць прыбіральні і дамы, крадуць асабістыя рэчы і маёмасць. З нашага гаража быў скрадзены квадрацыкл, які цяпер часта бачаць у акругах Новай Тавалжанкі. Акрамя гэтага, людзі скардзіліся на скрадзены прычэп. Цяпер ён катаецца разам з нашым квадрацыклам», — напісала яна.
«Мы не хочам, каб нашы дамы, якія і так пацярпелі ад дзеянняў УСУ, цяпер былі яшчэ прытулкам для бязладдзя нашых абаронцаў!» — дадала Чамерчанка.
Кіраўнік адміністрацыі Шабекінскай гарадской акругі Уладзімір Жданаў адказаў, што «зварот перададзены ў Раду бяспекі» (структуру ў складзе гарадской адміністрацыі).
Іншыя карыстальнікі папракнулі Чамерчанку ў тым, што яна ў допісе паказала, дзе канкрэтна ў населеным пункце знаходзяцца расійскія вайскоўцы і цяпер па іх могуць нанесці ўдар.
«Тэлефануйце ў адміністрацыю, яны заўсёды на сувязі з людзьмі, вырашайце пытанне наўпрост, а не ў сацыяльных сетках такое пісаць — яшчэ б дом паказалі», — напісала адна з удзельніц дыскусіі.
Новая Тавалжанка знаходзіцца ў Шабекінскім раёне, які мяжуе з Украінай і падвяргаецца абстрэлам. Улады Белгародскай вобласці заявілі, што часова эвакуююць жыхароў у больш бяспечныя месцы.
Цяпер чытаюць
Зорка брэйкдансу з Віцебска атрымаў 11 гадоў турмы ў Кітаі. Што здарылася?3
Каментары