Вялікабрытанія сёння дадала шэсць пазіцый у санкцыйны спіс супраць Беларусі
Адносна гэтых прадпрыемстваў уведзена замарожванне актываў.
Брытанія дадала шэсць новых пазіцый у спіс санкцый супраць Беларусі. Пра гэта піша «Люстэрка» са спасылкай на брытанскае МЗС.
Пад абмежаванні трапілі:
- холдынг «БелОМА»,
- ААТ «Гомельскі радыёзавод»,
- ААТ «Кідма тэк»,
- Аршанскі авіярамонтны завод,
- ААТ «Пеленг»,
- ААТ «2566 завод па рамонце радыёэлектроннага ўзбраення».
Адносна гэтых прадпрыемстваў уведзена замарожванне актываў.
Паводле брытанскага МЗС, санкцыі ўведзеныя супраць прадпрыемстваў, якія маюць стратэгічнае значэнне для Беларусі, і супраць тых прадпрыемстваў, якія «датычныя або былі датычныя да дзеянняў, якія дэстабілізуюць Украіну або падрываюць і пагражаюць тэрытарыяльнай цэласнасці, суверэнітэту і незалежнасці Украіны, у тым ліку шляхам падтрымкі або садзейнічання Узброеным сілам Расіі».
Адметна, што два прадпрыемствы — «Пеленг» і «Кідма тэк» — ужо былі ўнесеныя ў санкцыйны спіс Брытаніі ў 2021 годзе з прычыны міграцыйнага крызісу на мяжы Беларусі з краінамі ЕС.
Папярэдні раз Брытанія абнаўляла санкцыі супраць Беларусі 8 ліпеня. Той пакет прадугледжваў забарону на імпарт золата, цэменту, драўніны і каўчуку з Беларусі і блакаванне экспарту ў Беларусь з Брытаніі банкнот і машын, а таксама тавараў, тэхналогій і матэрыялаў, якія могуць быць выкарыстаныя для вытворчасці хімічнай і біялагічнай зброі.
Цяпер чытаюць
Памёр 50-гадовы спецназавец Буцько. Ён быў удзельнікам выкрадання і забойства Захаранкі і Ганчара16
Каментары