Дэпартамент дзяржбяспекі Літвы лічыць, што Вольга Карач супрацоўнічала з расійскай разведкай — СМІ
Прычынай адмовы ў прадастаўленні прытулку актывістцы Вользе Карач маглі стаць падазрэнні ў яе супрацоўніцтве з расійскай разведкай. Аб гэтым піша reform.by са спасылкаю на BNS. Літоўскае агенцтва сцвярджае, што мае дакумент, у якім Дэпартамент дзяржбяспекі Літвы выкладае гэтыя падазрэнні.
«Па даных ДДБ, актывістка беларускай апазіцыі В. Карач, якая жыве ў Літве, супрацоўнічала з расійскай выведкай» , — цытуе BNS дакумент.
У ім пазначана, што Карач нібыта наведвала тэрыторыю Расіі ў 2015-19 гадах і сустракалася з прадстаўнікамі расійскай разведкі, падтрымлівала з імі кантакт праз «абязлічаныя сродкі сувязі», а таксама нібыта перадала расійскаму боку дакументы, якія змяшчаюць інфармацыю аб прадстаўніках беларускай апазіцыі.
Карач, згодна з дакументам, «імкнулася заручыцца падтрымкай расійскага ўрада ў сваёй палітычнай дзейнасці ў Беларусі і абмяркоўвала свае магчымыя палітычныя абавязацельствы перад Расіяй з прадстаўнікамі расійскай разведкі».
«Прадстаўнікі расійскай разведкі клапаціліся аб іміджы В. Карач у Літве і за мяжой, давалі парады і прапановы па дзейнасці ў публічнай прасторы, папярэджвалі і інструктавалі, як знізіць рызыкі», — прыводзіць агенцтва яшчэ адну цытату.
У дакуменце таксама гаворыцца, што расійская разведка можа выкарыстоўваць сувязі з Карач для дзейнасці, накіраванай супраць Літвы і яе інтарэсаў. Пры гэтым у ім ёсць спасылкі на засакрэчаную інфармацыю, якая ёсць у Дэпартамента дзяржбяспекі.
Вольга Карач адмаўляе ўсе такія абвінавачанні. Яна мае намер у аўторак правесці прэс-канферэнцыю.
«Я ні з чым не супрацоўнічала і не магла супрацоўнічаць. Я не супрацоўнічала ні з якімі інстытутамі варожых краін — ні Беларусі, ні Расіі. Я ніколі не супрацоўнічала, я не ведаю, хто што кажа, калі ў іх ёсць іншая інфармацыя, няхай публікуюць» , — адказала яна Delfi на просьбу пракаментаваць інфармацыю, якая з'явілася.
На мінулым тыдні сама Вольга Карач расказала расійскім СМІ аб тым, што ёй адмовілі ў прадастаўленні прытулку, а прычынай гэтага нібыта з'яўляецца яе інтэрв'ю з Уладзімірам Жырыноўскім , а таксама ўдзел у шэрагу канферэнцый у РФ, якія праводзіліся пры ўдзеле Еўракамісіі.
Вольга Карач да 2020 года была частай госцяй у расійскіх пракрамлёўскіх выданнях, у прыватнасці, на «Лента.ру» і «Газета.ру». Ад восені 2020 года яна атакавала Святлану Ціханоўскую. Мемам сталі словы экс-сілавіка Ігара Макара, што Юрый Зянковіч «паехаў у Маскву пад гарантыі бяспекі ад Вольгі Карач». У Маскве Зянковіча арыштавалі, разам з Аляксандрам Фядутам.
Карач таксама беспаспяхова падавала заявы ў праваахоўныя органы Літвы і камісіі па этыцы на незалежныя СМІ.
Вольга Карач заявіла, што яе прызналі пагрозай нацыянальнай бяспецы Літвы
Вольгу Карач прапануюць вылучыць на Нобелеўскую прэмію міру
«Можна атрымліваць грошы пад барацьбу за правы трансгендараў, можна — супраць іх». Вольга Карач — пра жыццё ў Вільні, хваробы і даходы
Хто такая Вольга Карач, якая хоча падсядзець Ціханоўскую?
Вольга Карач стварыла новую кааліцыю. Хто гэтыя людзі?
Цяпер чытаюць
Стала вядома, дзе працуе фаварытка Лукашэнкі Уладлена Зайцава13
Каментары