Адміністратарам украінскага тэлеграм-канала, які дапамагаў пазбягаць позваў, аказалася беларуска
Канал даваў інфармацыю па запланаваных маршрутах супрацоўнікаў украінскіх ваенкаматаў у населеных пунктах бліз Беларусі. Жанчыне вынеслі прысуд.
Любешаўскі раённы суд Украіны вынес прысуд грамадзянцы Беларусі Кацярыне Хлысцік за публікацыю інфармацыі пра месцы і час уручэння позваў супрацоўнікамі ўкраінскіх ваенкаматаў у населеных пунктах бліз мяжы з Беларуссю.
Як вынікае з прысуду ад 13 лістапада, з красавіка па май 2024 года Кацярына адміністравала тэлеграм-канал, дзе вышэйзгаданая інфармацыя публікавалася па населеным пунктам Камень-Кашырскага раёна Валынскай вобласці Украіны. На канал жанчыны былі падпісаны 992 чалавекі.
За «перашкоду законнай дзейнасці Узброеных Сіл Украіны і іншых вайсковых фармаванняў» (ч. 1 арт. 114-1 КК Украіны) жанчыне прызначылі 3 гады прабацыйнага нагляду (абмежаванне правоў і кантроль перасоўванняў без ізаляцыі ад грамадства). Прысуд яшчэ можна абскардзіць у апеляцыйным судзе.
Абвінавачаная сваю віну прызнала. У судовым дакуменце пазначана, што жанчына паходзіць з вёскі Дубраўцы Брэсцкай вобласці Беларусі, мае трох малалетніх дзяцей, не працуе, судзімасцяў не мае.
Каментары