Пазняк: І рэжым Лукашэнкі, і псеўдаапазіцыя — гэта адно і тое ж

Пасля аб'ёмных тэарэтычных уводзін, у якіх Пазняк разважае пра сутнасць рэжыму Лукашэнкі і яго адрозненне ад іншых аўтарытарных рэжымаў, вядомы грамадскі дзеяч пераходзіць да пытання «характэрнай і шкоднай для нацыі методы стварэння кіруемай рэжымнай апазіцыі».

Паводле яго сцвярджэння, гэты прыём зусім не свежы — яго «прыдумалі расейцы ў пачатку 20-га стагоддзя для барацьбы са свабодай і беларускім нацыянальна-вызвольным рухам». Згодна з ім, расейцы ствараюць «сваю кіруемую апазіцыю супраць сваёй жа ўлады і супраць свайго рэжыму». А тая пасля ўжо праводзіць карысную Маскве дзейнасць паводле звычайнай схемы:

«Створаная псеўда-апазіцыя, прасякнутая агентурай (асабліва ў кіраўніцтве), дэкларатыўна выступае супраць рэжыму дыктатуры, асабіста супраць дыктатара, на словах змагаецца за свабоду слова, за вольныя выбары, правы чалавека і г. д. — поўны набор».

Пазняк жорстка і з'едліва крытыкуе тых, хто змагаецца ў Беларусі «за дэмакратыю», для каго «галоўнае — дэмакратыя і яшчэ раз дэмакратыя», але «пры гэтым не ставіцца пытанне беларускага нацыянальнага адраджэння і нацыянальнага змагання супраць антыбеларускай палітыкі Расеі».

«Псеўда-апазіцыя прадумана дэзарыентуе беларусаў, адцягвае іх ад рэальнага змагання з расійскім ворагам за нацыянальную свабоду, за нацыянальныя каштоўнасці, за беларускую мову і нацыянальнае адраджэнне. «Псеўды» ўцягваюць беларусаў у імітацыю палітыкі, якая, па сутнасці, з'яўляецца каланіяльным праектам і па задумцы — бяспройгрышная для Масквы», — сцвярджае ён.

У рамках гэтай парадыгмы, як сцвярджае Зянон Пазняк, за ўвесь час 

«было некалькі псеўдаапазіцыйных накатаў на антыбеларускі рэжым і шмат правакацыйных вылазак, пасля чаго рэжым праводзіў зачыстку грамадства ад актыўных беларусаў і пачынаў рэпрэсіі супраць нацыянальна здаровага насельніцтва, умацоўваючы сваю ўладу. Апошняя правакацыя адбылася ў 2020-м годзе».

Пасля гэтай «апошняй правакацыі» разам з тысячамі беларусаў за мяжой апынулася, маўляў, і «псеўда-апазіцыя».

«Мы бачым як за мяжой працягваецца падтрымка псеўдаапазіцыі з боку лева-ліберальнага Еўрасаюза і адкрытае яе напаўненне агентурай (расейскай і лукашысцкай). Па маіх назіраннях, колькасць агентаў і стукачоў у так званым віленскім «офісе» большая, чым колькасць не стукачоў і не агентаў. Зараз яны нават не прыкідваюцца і не хаваюцца, дзейнічаюць амаль адкрыта, карыстаючыся бесталковасцю заангажаваных пад сябе беларусаў. Стратэгічная задача псеўда-апазіцыі за мяжой такая ж самая: на выпадак упадку рэжыму Лукашэнкі замяніць яго (пры падтрымцы немцаў і Масквы) і прадоўжыць прамаскоўскую арыентацыю беларускага грамадства», — прарочыць ветэран беларускага руху.

Праўда, Пазняк сумняецца, што ў гэтай апазіцыі нешта можа атрымацца «з прычыны поўнай палітычнай нямогласці», хоць «у прарасейскай шкоднай справе ўсё магчымае». Паводле яго:

«У сувязі са становішчам, якое склалася, гіпатэтычна існуе толькі адзін варыянт усталявання народнай беларускай улады пасля ліквідацыі прамаскоўскага рэжыму. Гэта, калі ў выніку абставінаў, масава падымецца народ. Я ўжо пісаў, што беларускі нацыянальны авангард у гэты час будзе гатовы да адпаведных канкрэтных дзеянняў. Усе астатнія варыянты, пра якія пішуць некаторыя аналітыкі, — умоўна-верагодныя, але пакідаюць ва ўладзе антынародны рэжым».

Варыянт жа з «псеўда-апазіцыяй» і яе прыходам да ўлады пры гэтым, маўляў, нават не разглядаецца. Але затое ў дачыненні да гэтай апазіцыі ёсць цвёрды план у самога Пазняка: 

«У выпадку народнай рэвалюцыі першым чынам павінна быць праведзена жорсткая люстрацыя. (І найперш люстрацыя псеўда-апазіцыі.) Прытым без прамаруджвання. У выніку ў асяроддзі агентурнай псеўда-апазіцыі адбудуцца гвалтоўныя перамены. Магчыма, нават за кратамі.

Беларусам, нарэшце, трэба ўсвядоміць відавочнае, што і рэжым Лукашэнкі, і псеўда-апазіцыя — гэта ў дачыненні да нацыянальнай будучыні Беларусі — адно і тое ж. Вольнай нацыянальнай будучыні не будзе. Тут два бакі аднаго медаля. Адпаведна, адносіны да іх — аднолькавыя».

• 36
• 4
• 9
• 31
• 2
• 1
• 1
• 6