Гэта максімальны паказчык з пачатку вайны.
За пераход Расіі да мірных перамоў выказаліся 53% расіян, апытаных у лістападзе даследчай кампаніяй Russian Field. Гэта максімальны паказчык з пачатку вайны, піша Расійская служба Радыё Свабода.
За працяг баявых дзеянняў выказаліся 36% рэспандэнтаў — мінімум за ўвесь перыяд назіранняў з сакавіка 2022 года. Тэндэнцыя да павелічэння колькасці прыхільнікаў мірных перамоў і змяншэння колькасці прыхільнікаў вайны назіраецца з лютага 2023 года.
Найлепшую падтрымку мірных перамоў выказваюць жанчыны (59%), моладзь (68%), малазабяспечаныя расіяне (59%), аўдыторыя інтэрнэт-СМІ і тэлеканалаў (па 51%). У прафесійным плане пераход да перамоў часцей падтрымліваюць работнікі ІТ, гандлю і аховы здароўя, а працяг вайны — работнікі прамысловасці.
Падпісанне міру «заўтра» падтрымалі б 79%, прычым 60% апытаных згадзіліся б на пагадненне аб прыпыненні агню без папярэдніх умоў.
Дзве пятыя апытаных у сувязі з вайной адчуваюць небяспеку асабіста для сябе. Больш за ўсё трывогу выклікаюць ударныя дроны (27%), эканамічная сітуацыя (20%), абстрэлы (18%), мабілізацыя (17%) і смерць або траўмы блізкіх (12%).
Раней, 19 лістапада, вынікі аналагічнага апытання, праведзенага ва Украіне, апублікавала даследчая кампанія Gallup. З іх вынікае, што з пачатку вайны колькасць украінцаў, якія лічаць, што краіна павінна весці вайну з Расіяй да поўнай перамогі, знізілася амаль у два разы. У 2024 годзе 52% рэспандэнтаў хацелі б, каб Кіеў як мага хутчэй пачаў перамовы аб міры, у той час як 38% выказаліся за працяг вайны да перамогі.
Цяпер чытаюць
Замест вайны сланы ў новай кнізе Сашы Філіпенкі. Там Масква і шмат маніпуляцыі3
Каментары